Arranca un nuevu fin de selmana braniegu n’Asturies con conciertos y eventos nes tres zones del país. Tornen dos nueves ediciones d’Una Señora Fiesta y el Festival Intercélticu d’Avilés y Comarca. Amás, aporta la Nueche Celta de Candás dempués de diecisiete años. Ente los conciertos, panderetes. bandines, dellos grupos de folk, asturianada, rock astur y música urbana.
Loína, José Manuel Tejedor y Llan de Cubel toquen güei a partir de les 22h na XI Nueche Celta de Candás nel Prau Gervasia. Dende mañana, sábadu 20, Avilés acueye la XXVII edición del so Festival Intercélticu con bandes de gaites, grupos de baille, música tradicional y folk de dellos países. El protagonismu d’esti primer fin de selmana del eventu llévalo la música asturiana cola actuación de Los Gascones a les 12h del sábadu, el taller de baille impartíu por Laura Ruiz a les 20h y la Nueche en Danza cola mesma bandina y el grupu de pandereteres y curdión De Cotía a partir de les 22h. Amás, el domingu actúen la Banda Gaites Esbardu, 6 Riales -22.15h- y la Bandina Turcipié -23.45h-.
Per otru llau, Una Señora Fiesta vuelve a celebrase nel prau de La Bilortera en Vegarrionda (Piloña) esti sábadu con un formatu diferente al d’otros años. Nesta ocasión, nun va haber conciertos. USF2024 ye una romería como les de tola vida, autoxestionada, con instrumentos tradicionales y panderetes, ensin altavoces. Amás de música y baille va haber un concursu de picnics, xuegos tradicionales y un concursu-desfile de bañadores singulares. Nel oriente d’Asturies va poder esfrutase tamién de les versiones de Los Gascones en Cangues d’Onís -güei a les 20h-, el folk de Baxel en Camangu (Ribeseya) a les 22h del sábadu y les voces de tonada de los Cancios de Chigre per Llastres (Colunga) -domingu 21 a partir de les 13h-.
L’axenda de conciertos complétenla Marisa Valle Roso nel Xardín Botánico de Xixón a les 22h d’esti vienres, el grupu de rock astur Dixebra güei a les 23.30h nes fiestes de La Laguna de L’Entregu y el músicu mozu Ferla Megía, qu’actúa esti sábadu 20 a les 18h nel C.P. San Jorge de Luiña (Ibias) nun alcuentru comunitariu alredor de les nueves ruralidaes entamáu por Espacio Tormaleo.
Más que conciertos
La fase clasificatoria del 42 Concursu de Canción Asturiana d’El Comercio continúa esti fin de selmana na Plaza la República d’El Coto (Xixón), güei y mañana a les 19h, cola participación de más de 20 cantadores. Pa finar les actividaes, el Festival Internacional de la Gaita de Villaviciosa anuncia l’actu de presentación de la edición d’esti añu -5, 6, 7 y 8 de setiembre- pa esti domingu 21 a les 17h nel Atenéu Obreru de Villaviciosa, onde va tocar la Banda Gaites Villaviciosa «El Gaiteru».
MERCA DISCOS DE LOS ARTISTES QU’ACTÚEN ESTI FIN DE SELMANA
Suscríbite a les nuestres novedaes
