Dende güei y hasta’l domingu 9 d’agostu celébrase en Xixón la XXVI edición de Festival Internacional de Gaites Villa de Xixón. Charres, talleres, desfiles, actuaciones, proyecciones y actividaes pa la reciella formen el programa d’esti eventu consolidáu nel calendariu de la escena tradicional y folk que va acoyer más de venti actuaciones repartíes ente la Plaza’l Parchís, la Escuela de Comercu, la Plaza’l Marqués, los Xardinos de la Reina, la Plaza del 5 d’agostu, el Muru y el Náutico.
Tres de la presentación d’ayeri, la programación arranca güei martes 4 a les doce’l mediudía con un taller pa la reciella de construcción d’instrumentos traddcionales. Va ser na Plaza’l Parchís, onde se celebren la mayoría de les actividaes del eventu. D’esta manera ye como a les 13h d’esti martes actúa la Bandina Villa de Xixón; a les 18.30h Leirana y a les 20h la banda escocesa Milngavie Pipe Band; ente otres actividaes.
El miércoles 5 a les 12h toca la Bandina Villa de Xixón y a les 13h hai un taller de gaita y baille escocés. Pa les 18h proyéctase na Escuela de Comerciu’l documental Y agora que lo baillen los rapacinos. Lo llixero n’Asturies de l’Andecha Folclor d’Uviéu; a les 19.30h Ambás ya Ramsés dan la charra La Danza B.I.C y pa les 20.30h actúa la formación bretona Fest Noz Bagaz Arvorizion Karnag.
La programación del xueves 6 y el vienres 7 d’agostu ta protagonizada poles formaciones internacionales. A les actuaciones de la Milngavie Pipe Band y de la Bagaz Arvorizion Karnag súmense les de la gallega Banda de Gaitas Nova Fronteira y la mallorquina Xeremiers de Soller. Toes elles van desfilar el vienres a les ocho la tarde nel Desfile Intercélticu que percuerre de La Escalerona a la Plaza Mayor, onde se celebra la Gala d’esti XXVI Festival Internacional de Gaites Villa de Xixón presentada por David Arango.
La programación remata’l fin de selmana con más pases de les agrupaciones internacionales, que van compartir l’escenariu de la Plaza’l Parchís con un conciertu del pernomáu gaiteru José Manuel Tejedor (sábadu 8 a les 18.30h); el desfile de Cabezudos de la Banda Gaites Infantil Magüeta (domingu 9 a les 12h); xuegos tradicionales y comida popular; y el Conciertazu Pal Baille, que va poner el ramu a les 18.30h del domingu a esti festival clásicu del branu xixonés entamáu pola Banda Gaites Villa de Xixón y col sofitu de Divertia y la Conseyería de Cultura, Política Llingüística y Deporte.
Suscríbite a les nuestres novedaes
