Aviles y Xixón convoquen ayudes onde la música asturiana puede ser protagonista

Los conceyos d’Avilés y Xixón convocaron nestos díes últimos una serie de convocatories onde la música asturiana puede tener un papel relevante. En toles ayudes espublizaes, con diverses finalidaes, proyectos musicales o venceyaos con esta pueden tener el so espaciu.

Nel casu d’Avilés, el conceyu llanzó una partida d’hasta 140.000 euros pa festivales grandes de música y danza a celebrase mientres el mes d’agostu, ye dicir, alredor de los actos programaos per San Agustín. Los proyectos van valorase según l’interés cultural, la proyección territorial y l’allugamientu, riquiendo un mínimu del 40% de la puntuación pa recibir financiación.

Va haber dos llinies d’actuación subvencionables. La primera ta pensada pa entidaes ensin porgüeyu económicu d’Avilés. Nesti casu, van subvencionase proyectos con una cuantía superior a 6.000 euros y hasta un máximu de 45.000 euros. La segunda llinia ta dirixida a profesionales y empreses con domiciliu social n’Asturies, que desendolquen la so actividá principalmente n’Asturies. Los proyectos podrán recibir ayudes dende 6.000 euros hasta 60.000 euros. El plazu ta abiertu hasta’l 25 de mayu. Tola información d’esta convocatoria puede consultase nel Boletín Oficial del Principáu d’Asturies (BOPA).

Xixón convoca d’una sentada toles ayudes de la Fundación Municipal de Cultura

Pela so parte, el conceyu de Xixón convocó toles ayudes que llanza cada añu la Fundación Municipal de Cultura. Son, en total, 8 llinies d’ayudes: asociaciones y colectivos xuveniles, asociaciones culturales, centros d’enseñu y entidaes educatives, cultura tradicional y llingua asturiana, teatru y danza, producciones artístiques, editoriales, galeríes d’arte y promoción de la música coral.

En caúna d’estes llinies, la música asturiana puede tar presente d’una manera o otra, afaciéndose a les condiciones de cada convocatoria, yá que en toes l’oxetivu principal ye’l desenvolvimientu de proyectos d’interés xeneral relativos a la promoción, divulgación y difusión de la cultura. El plazu pa estes ayudes remata’l 29 de mayu y pueden consultase de manera detallada na web del conceyu.