La Tertulia Feminista y Antifascista Musa Cafeína organiza les I Xornaes Otras NosOtras col oxetivu de «visibilizar la obra d’artistes asturianes escasamente reconocíes». Tolos xueves del 19 de febreru al 12 de marzu a les 19h, la sede del Atenéu Obreru de Xixón (vieya Escuela de Comerciu), acueye estes conferencies nel que, ente otres, participen les muyeres venceyaes a la escena de música n’asturianu Ana Lamela y Carla Miranda.
Les artistes homenaxeas son la cupletista, Lilián de Celis; la grabadora, fotógrafa y artista del origami, Anah Dime; la pionera del teatru de creación, Eloína Sánchez Vega y la escritora Sara Suárez Solís. Cada xornada va tar dedicada a una d’estes cuatro muyeres que van ser visibilizaes a traviés d’un trabayu d’investigación fechu poles propies componentes de la Tertulia Musa Cafeína.
Dalgunas integrantes d’esti colectivu son, ente otres, les músiques Vero Rubio, Carla Miranda y Antía Eseuve; les escritores y/o poetes Marta Mori, Ana Lamela (tambén música), Rosa Valle, Carmen Cabeza, Julia Navas, Laura Marcos y Mercedes Ruisánchez; l’actriz y narradora oral Laura Cuervo y la fotógrafa Laura Rodríguez; la mayoría de ellas multifacéticas e interdisciplinares. Toles conferencies tienen entrada llibre.
Suscríbite a les nuestres novedaes
