Esta selmana continúa la Universidá Asturiana de Branu (UABRA), los cursos que pon en marcha l’Academia de la Llingua Asturiana en collaboración cola Universidá d’Uviéu. y el Conceyu Casu. Ente los siete cursos qu’hai, dende güei y hasta’l vienres 11 d’agostu van desendolcase los dos cursos de 30 hores de duración que tienen a la música y a la cultura popular como protagonistes; el de Recoyida y recuperación de la tradición oral y musical y el de 50 años en movimientu: ámbitos y espacios de desendolcu, normalización y vindicación de la llingua asturiana na historia recién.
Xosé Antón «Ambás», Ramsés Ilesies, José Ignacio Suárez, Mapi Quintana y Llorián García son los responsables d’impartir el cursu Recoyida y recuperación de la tradición oral y musical. Ta empobináu a persones interesaes na música y la tradición oral d’Asturies, recopiladores de patrimoniu, activistes y axentes de recuperación cultural; y va tener les siguientes asignatures: Teoría y casos de recoyida y recuperación (10h), Metodoloxía y trabayu de campu en Casu (11h), Averamientu al baille y la percusión (4h), y Otres visiones de la tradición musical recuperada (5h).
Per otru llau, l’asignatura La música en llingua asturiana: historia recién del so desendolcu y posibilidaes como industria del sieglu XXI, ye una de les que da forma al cursu 50 años en movimientu: ámbitos y espacios de desendolcu, normalización y vindicación de la llingua asturiana na historia recién. El músicu y responsable de Goxe Producciones, Xune Elipe, y el responsable de Musicasturiana.com, Xicu Ariza, son los dos profesores de l’asignatura. A lo llargo de 3 hores Elipe va facer un repasu pel fenómenu musical en llingua asturiana apaecíu al calor del movimientu modernu de vindicación llingüística y la so evolución histórica hasta’l momentu actual Per otru llau, Ariza va centrase nel componente más económicu d’esta escena, enmarcándola dientro de les Industries Culturales y Creatives, analizando les polítiques culturales desendolcaes y los vezos de consumu n’actual dómina dixital. Amás, esti cursu fai un repasu pel periodismu, cine, lliteratura, escolarización y la historia de la reivindicación llingüística nos 50 años últimos con clases impartíes por Cristobal Ruitiña, Inaciu Galán, Marcos Rodríguez, Pilar Fidalgo, Rafael Rodríguez Valdés y Ramón Lluis Bande.
Nueche en Danza
Amás de los cursos, la UABRA organiza tamién actividaes abiertes al públicu rellacionaes cola cultura asturiana. Dientro d’elles destaca la d’esti miércoles 9 na que, dende les 22.15h la nueche, la plaza d’El Campu va acoyer una “Nueche en danza”, qu’inclúi un taller pal baille tradicional.
Suscríbite a les nuestres novedaes
