La 41 edición del Concursu de Canción Asturiana d’El Comercio, en Xixón, yá tien clasificación final. Un total de 36 cantadores participaron nesta competiciones que lleva celebrándose dende finales de xunetu con delles fases. El pasáu 4 y 5 d’agostu celebróse la final na Plaza Mayor de Xixón y yá se conoz la clasificación de los siete finalistes en caúna de les dos categoríes; l’absoluta masculina y l’absoluta femenina. Dientro de la clasificación, la yerbata Alicia Villanueva algamó’l primer puestu na estaya de muyeres y el parragués Isaac Sierra na d’homes. Esti domingu 13 van facese la entrega de los premios a les 12.30h na xixonesa Plaza Mayor.
Dientro de la categoría femenina, el repartu de puestos según les puntuaciones foi’l siguiente: el primeru p’Alicia Villanueva (Bimenes); segundu pa Lorena Corripio (Colunga); terceru pa Liliana Castañón (Mieres del Camín); cuartu pa Tatiana Suárez (Xixón); quintu pa María Luisa Martínez (Xixón); sestu p’Águeda Riera (Villaciosa) y séptimu p’Aurora Platas (Mieres).
Na categoría masculina, les puntuaciones dieron esti resultáu: el primeru pa Isaac Sierra (Parres); segundu pa Esteban Verdeja (Cantabria); terceru p’Andrés Cueli (Villaviciosa); cuartu pa Celestino Rozada (Llanes); quintu Álvaro Fernández (Cantabria); sestu pa César González (Somiedu) y séptimu pa José García (Cangas).
Medren los sos premios
Tanto Alicia Villanueva como Isaac Sierra yá ganaron anteriormente nesti concursu veteranu. Sicasí, Alicia Villanueva ye la primer vez qu’algama l’oru na estaya absoluta -enantes ficiéralo na de mocedá-, tou un llogru pa la cantadora yerbata que namás tien 22 años d’edá. Con esti premiu, Villanueva sigue faciendo’l so camín ascendente dientro de la tonada asturiana y afitándose como un relevu nel xéneru. Amás, próximamente va asoleyar les sos primeres canciones grabaes n’estudiu xunto a Luis Álvarez Pola dientro del compilatoriu Semando Son que va editar MUSICASTURIANA.COM.
Suscríbite a les nuestres novedaes
