El tríu de folk entós, formáu por Celia Nieto -vigulín-, Adrián Argüelles -flauta- y Javi Menéndez -cuerdes-, tán acabantes d’asoleyar el so primer single en toles plataformes dixitales: ‘Barro‘, cola collaboración de Dani Álvarez al bodhrán. Ye’l primer tema que publiquen del so próximu EP, un trabayu discográficu que mira al folk dende perspectives estremaes, producíu y grabáu por Senén Fernández nos Estudios 15:40 de Perdones (Gozón). El diseñu de la portada ye obra de PerezVillar.
Anque la so idea orixinal yera un set de flauta, vigulín, bouzouki, mandolina y guitarra, nel reportaxe que Musicasturiana.com dedicó al so llabor de post-producción nel estudiu va dellos meses desplicaron que «l’atmósfera creativa del procesu» empobinólos a amestar una llinia de percusión -bodhrán nesti casu- y de baxu, interpretaes por Dani Álvarez y Senén Fernández. El resultáu ye’l que llamen el tema más folki del so repertoriu, un homenaxe a les estructures clásiques de Felpeyu con un set de tres pieces en ritmu de muñeira qu’inclúi ‘Cachos‘ -una composición de Javi- y la so interpretación del cantar ‘Nun hai carretera sin barru‘. Nél xueguen coles testures, intercambios de función ente’l vigulín y la flauta, melodíes clares y precises, maneres diverses de preparar les modulaciones y detalles cuasique d’orfebrería como la llinia de mandolina que suena na parte central.
L’entamu d’entós foi va dellos años col envís d’esfrutar tocando xuntos. Sicasí, quixeron da-y forma al proyectu y «intentar ser un eslabón más de la cadena de tresmisión de la música asturiana na so xeneración», como ellos mesmos comenten, buscando dexar la so buelga propia. Tán apostando, amás, pola autoxestión, preparando cada parte del so proyectu artesanalmente y con procuru. El so primer conciertu foi n’ochobre en Cervera de Pisuerga (Palencia) y, pel momentu, tienen la so primer fecha confirmada pa estrenar el so trabayu nel Festival Folkomillas de Cantabria, el domingu 22 de xunu.
Semeya de portada de Lucía Garó
Suscríbite a les nuestres novedaes
