Sobre’l verde de la malaquita siéntese’l cantu del páxaru ʻōʻō . Esi cantu yá namás esiste nel planu de la memoria dixital. La última grabación ye de 1987, xusto enantes de que desapaeciera como tantes especies d’esti planeta. El cantu que sentimos ye pa siempres un cantu incompletu, falta a esa entruga del que canta la rempuesta naquello que yera un ritual de cortexu. Anque nun conozas la triste hestoria d’esti páxaru estintu de la isla de Kauai, vas entender qu’al so cantu fálta-y una parte. El cantar ocupa la escena como una entruga, aguantando pola rempuesta. Y nesi bucle entra baxo los focos la banda.
Joseba Irazoki, Ferrán Resines, Hans Laguna, Manu Molina, Miren Narbaiza y Nacho Vegas arranquen con ‘Alivio’, el que fuera primer adelantu de Vidas semipreciosas (Oso Polita, 2026), nuevu álbum del xixonés que ta acabante de llegar a les tiendes de discos y les plataformes. La xira entamó’l fin de selmana pasáu en Mieres y L’Infiestu y promete ser un viaxe d’obsidianes, ágates, jaspes, turmalines y onyx que los va llevar de momentu per tol estáu español y México durante esti añu. Y anque dende setiembre llevamos sintiendo que quiciabes cualquier placer seya un aliviu, lo cierto ye qu’hai nesti trabayu de Vegas dellos páxaros, y el cormorán, col so esnalar y determín puede ser la única cosa qu’almirar y deseyar nesti tiempu de llevar a xocostrines la piedra de Sísifo ca día. Dende la invitación al deséu entamaba’l conciertu nes dos ciudaes escoyíes como primeres feches.
«Nun ye casual qu’abra la xira n’Asturies nin tampoco ónde: la caxa de resistencia de Mieres y el so compromisu cola cultura y lo que supón La Benéfica pal conceyu de Piloña y p’Asturies son bones razones pa que seya asina. Tamién tien que ver col procesu creativu de composición»
Nun ye casual qu’abra la xira n’Asturies nin tampoco ónde: la caxa de resistencia de Mieres y el so compromisu cola cultura y lo que supón La Benéfica pal conceyu de Piloña y p’Asturies son bones razones pa que seya asina. Tamién dalgo que ya pasara cola xira anterior, Mundos inmóviles derrumbándose, col Teatru Fantasio de Navia, y tien que ver col procesu creativu de composición. D’aquella trabayó los cantares pel occidente d’Asturies y para Vidas semipreciosas esi procesu cuntó col paisaxe del Sueve visto primero dende Colunga y llueu dende Piloña.
«Humor pal posicionamientu vital, que ye inevitablemente políticu, y tamién amor. Ún de los momentos más guapos pa quien asistieron al conciertu en Mieres Centru Cultural foi cuando pa presentar el cantar ‘Fíu’ sintióse la rempuesta dende les primeres files de Cristina Vegas, la ma del artista antifascista, a quien va dedicada por da-y la vida y llueu dexa-y vivila»
A lo llargo de les cuasi dos hores de conciertu dieron a conocer dellos temes del discu, amás de los otros dos adelantos: ‘Los asombros’ y ‘Mi pequeña bestia’. Mientres ‘Deslenguarte’ -esi himnu a les llingües, lo que facemos con elles y sobremanera el poder tresformador qu’encierren– nel discu cuenta cola collaboración de Albert Pla, pal directu tuvo como interlocutor d’esa postal que Vegas envía na lletra al guitarrista de Nafarroa Joseba Irazoki. Humor pal posicionamientu vital, que ye inevitablemente políticu, y tamién amor. Ún de los momentos más guapos pa quien asistieron al conciertu en Mieres Centru Cultural foi cuando pa presentar el cantar ‘Fíu’ sintióse la rempuesta dende les primeres files de Cristina Vegas, la ma del artista antifascista, a quien va dedicada por da-y la vida y llueu dexa-y vivila, por dar ferramientes y saber qu’ensin xusticia llibertá nun ye cosa cierta. Un “Te quiero, cariño” dende les butaques que resonaba mientres cantaben nel escenariu “Por eso en esta familia somos de izquierdas”.
Dicía humor y amor, y tamién una reivindicación de tar y facer en comuña, de nun tar soles en tiempos escuros, de llobos. El odio disfrazado con la piel de un hermoso animal. Y tiempos de pardalinos cantando, concretamente los seis (les seis) qu’agoran pasen les nueches na cárcel d’Asturies por facer sindicalismu y defender a una trabayadora nel conflictu de La Suiza. Nesi momentu’l públicu coreó con fuercia “Llibertá pa Les Seis de La Suiza” y na Benéfica llenaron l’escenariu Leticia Baselgas, Rodrigo Cuevas y Rubén Bada, que collaboren nel discu glayando lo que yá nun vamos callar. Y nesos momentos reafirmamos que ye imposible -voi permitime nesta crónica qu’una escribe ensin disimular almiración y afinidá a lo que Vegas y la so banda, y el so equipu defienden col so trabayu- caltener esa idega de que la cultura nun puede aprovechase d’esi espaciu pa facer política. Nun contar lo que ta pasando, nun falar de la memoria baxo cunetes, nun compartir lo qu’abluca ye tamién político, y apuntala’l poder de quien fai lo que quier (nes empreses, nes cais, nos estaos) dende la podre impunidá del privilexiu absolutu.
«Nun contar lo que ta pasando, nun falar de la memoria baxo cunetes, nun compartir lo qu’abluca ye tamién político, y apuntala’l poder de quien fai lo que quier (nes empreses, nes cais, nos estaos) dende la podre impunidá del privilexiu absolutu»
Hai un cantar más ente los nuevos del repertoriu, que quedó pa los bises: ‘Les ales’, la versión n’asturianu de ‘Txoria, txori’ de Mikel Laboa, que sonó con fuercia y guapura baxo les lluces guíaes col bon facer de Lara Vallina. Sí, nesti discu y nesta xira suena l’asturianu en dellos cantares (y n’otros suena en delles partes de la lletra) y si esto siempre ye dalgo que caracteriza a los discos de Nacho Vegas, hai una mayor presencia que xeneró una conexón evidente col públicu. De fechu, foi n’asturianu como’l músicu se dirixió tol tiempu a quien ellí tábemos.
«Sí, nesti discu y nesta xira suena l’asturianu en dellos cantares (y n’otros suena en delles partes de la lletra) y si esto siempre ye dalgo que caracteriza a los discos de Nacho Vegas, hai una mayor presencia que xeneró una conexón evidente col públicu. De fechu, foi n’asturianu como’l músicu se dirixió tol tiempu a quien ellí tábemos»
Y col mesmu pesu, o más, de les vides semiprecioses, sonaron otres piedres conocíes (‘Crujidos’, ‘La Plaza de la Soledá’, ‘Nuevos planes, idénticas estrategias’) y otros animales (‘A ver la ballena’, que foi emocionante sentir en direuto, como munches comentaben a la salida). Ún de los momentos más intensos d’esi repertoriu que recoyía d’estos veinticinco años de música baxo’l nome de Nacho Vegas qu’agora se cumplen foi con ‘Morir o matar’. Equí quiero mencionar tamién el trabayu de Gus Bocanegra que fizo la so maxa en dos aforos bien estremaos. Y de tol equipu de Furia qu’andaben faciendo posibles con trabayu finu los dos bolos, y la xira entera. Y d’esa parte invisible i imprescindible d’Oso Polita, cola música Bea Concepción al frente.
La banda nesta ocasión cuenta cola incorporación de la guitarrista y cantante Miren Narbaiza, a quien conocemos pol so proyectu Mice, col que yá tocara en Mieres en 2023 de la mano d’Ixuxú Cultura. La so voz en ‘Ser árbol’ o ‘Los asombros’ enllenaben la sala. A Resines y Laguna vímoslos hai menos tiempu nel pieslle de La Salvaje n’Uviéu a finales de xunu del añu pasáu. Son, xunto a Christian Pallejà, Caballo Grande, l’estudiu que produxo xunto al propio Vegas esti caberu discu. Molina, la constante de los escenarios de Nacho Vegas dende 2001, completa una banda que tuvo enorme y esto ye munchu dicir escribir cuando falamos de los primeros conciertos d’una xira de munchos meses.
«El vienres en Mieres llovía con ganes, pero nun quitó pa que los chigres de la Cai Jerónimo Ibrán tuviesen esi ruxerrux de folixa, d’alcuentru y d’entusiasmu. El sábadu, L’Infiestu yera una fiesta, ente la Cai del Quesu hasta la nave de La Benéfica. Falo de comuña porque esto pasa’l rodiu de la música de Nacho Vegas. Y porque d’esto tamién tien que dir necesariamente la cosa: lo que pasa más p’allá del discursu creativu»
El vienres en Mieres llovía con ganes, pero nun quitó pa que los chigres de la Cai Jerónimo Ibrán tuviesen esi ruxerrux de folixa, d’alcuentru y d’entusiasmu. El sábadu, L’Infiestu yera una fiesta, ente la Cai del Quesu hasta la nave de La Benéfica. Falo de comuña porque esto pasa’l rodiu de la música de Nacho Vegas. Y porque d’esto tamién tien que dir necesariamente la cosa: lo que pasa más p’allá del discursu creativu, la rempuesta de quien anda a l’otru llau de la entruga que con un cantar (un llibru, un cuadru, un baille) se llanza. ¿Daisvos cuenta d’esi debate cargante sobre si l’arte tien que facer entrugues o dar rempuestes? Bono, quiciabes nun ye tala dicotomía. Quiciabes too paezse más a cuando dende la cultura, y énte la entruga compartía, quien la diz queda esperando a ver si ente toes atopamos una rempuesta. Una de toes pa toes, páxarinos que nun dexamos de ser, enantes de estinguinos.
Semeyes cedíes por Nacho Vegas.
Suscríbite a les nuestres novedaes
