Avilés acueye dende esti sábadu 20 hasta’l domingu 28 la XXVII edición del Festival Intercélticu d’Avilés y Comarca, una de les cites más importantes cola música celta y folk del branu asturianu. Amás de formaciones de Galicia, Bretaña, Irlanda y Escocia, van actuar hasta 12 bandes de gaites, grupos de baille, bandines y otres agrupaciones de música’l país. La programación completa pue consultase equí.
Los sones d’Asturies va entamar a sonar na Aldega Celta na exposición de Les Meanes a les 12h del sábadu 20 cola bandina Los Gascones. A les 20h, Laura Ruiz va dar un taller de baille como preparación pa la Nueche en Danza de les 22h na que van tocar Los Gascones y el cuartetu de panderetes y curdión De Cotía. Al día siguiente, domingu 21, actúa la Banda Gaites Esbardu dende les 13.30h. Pela nueche, va poder esfrutase de los conciertos de 6 Riales a les 22.15h y la Bandina Turcipié a les 23.45h.
El tradicional Alcuentru de bandes de gaites del festival llega’l llunes 22 a les 18.30h cola participación de la Banda Gaites Esbardu (Avilés), la B.G. La Madreña (Llanera) y la B.G. Saxum (Xixón). El dúu escocés Ross Ainlie & Tim Edey y los asturianos Pandereteros d’Anguañu son les dos formaciones qu’actúen na nueche del llunes, dende les 22.15h. El protagonismu de la tarde del martes 23 ye de la música tradicional y los grupos de baille que participen nesta edición: G.B. Tradicional Esbardu (Avilés), G.B.T. Fitoria (Uviéu) y G.B. La Xordia (Uviéu). Van poder vese dende les 18.45h peles cais y places d’Avilés. A les 22.15h toca’l dúu folk Baxel. El Ceylidh -baille tradicional escocés- zarra la cuarta xornada del festival.
El miércoles 24 y xueves 25 van poder sintise soníos irlandeses, escoceses y gallegos. El grupu celtíberu Stolen Notes abre la nueche del miércoles a les 22.15h y Ailá (Galicia) al día siguiente. El baille irlandés –Ceili– va zarrar el miércoles 24, mientres que la foliada gallega va faer lo mesmo’l xueves 25.
Estensión a Pravia y Corvera
Los caberos tres díes del festival -del vienres 26 al domingu 28- destaquen pola estensión de delles actividaes a Pravia y Corvera; el gran espectáculu de la Nueche Máxica «Lluna celta» a les 22.15h del vienres; el conciertu de José Manuel Tejedor y convidaos a les 22.15h del sábadu 27; la Fest-noz bretona que-y sigue a les 23.45h; y una tarde-nueche de domingu de pieslle d’esta edición del Festival Intercélticu d’Avilés con una Marcha Celta y Andecha Intercéltica dende les 19.30h hasta les 21.30h.
Suscríbite a les nuestres novedaes
