La Banda Sonora de Tasio

Dudu García (Xixón, 1983) ye l’alter ego del proyectu d’asturianada y electrónica Tasio y tamién componente d’El Velcro, dúu spoken word que forma xunto al escritor Pablo X. Suárez. Lleva venceyáu a la música de raigañu tradicional dende hai una montonera años y tien tocao en formaciones como Merlín, Pelgares, Cuchu o Zapica. Amás ye DJ baxo’l pseodónimu de Kind Oriciu.

Con él siguimos cola estaya «La Banda Sonora De…«, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.

Sienti la playlist La Banda Sonora de Tasio

Un discu qu’enxamás canses de sentir.

Selected Ambient Works d’Aphex Twin.

Si tuvieres que formar parte d’otru proyectu musical, ¿cuál sería?

La verdá qu’agora toi mui a gusto actuando yo solu, pero d’imaxinar otru proyectu veo crecer más na parte de visuales/ambientación, nun se m’ocurre otra banda de la que quiera formar parte.

De los cantares que compusisti o interpretes, ¿cuál ye’l to preferíu?

Lo que más me suel prestar ye lo último que toi faciendo, y nesti casu ye asina. Ye un cantar que se llama «Díes de lluvia», que tovía nun ta publicáu, pero que va formar parte del discu que toi preparando.

«Lo más inxusto de ser artista ye que creo que nun se valoren realmente toles hores de trabayu que metes nello. Y na mayoría de casos, amás, con mui poca compensación económica»

¿Cuándo foi la primer vez que xubisti a un escenariu y que pasó enantes, durante y depués?

La primer vez que xubí a un escenariu foi na Semana Negra hai pila años, con Paul, un profe que tenía de percusión africana. Lo que pasó enantes y dempués yá ye mucho pedir pa que m’alcuerde.

¿Qué ye lo más inxusto de ser artista?

Lo más inxusto de ser artista ye que creo que nun se valoren realmente toles hores de trabayu que metes nello. Y na mayoría de los casos, amás, con mui poca compensación económica, que muches veces nun da nin pa pagar instrumentos, cacharros, grabaciones, etc.

Si fueres Conseyeru de Cultura, ¿qué son les primeres coses que fadríes?

Dexar el cargu, LOL. Na, ye coña. Supongo que mediar ente contratar les coses que me presten a min y les que demanda la xente a la que representaría.

«Pablo X. Suárez tresmitióme una manera mui natural de sentir y practicar l’asturianu»

Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?

Col tema del asturianu mamélo dende guah.e, anque pa bastantes años renegué d’ello. Llueu, la xente cola que toqué (Martín, Xose, Valiente) averáronme otra vez a ello. Y especialmente Pablo X. Suárez. col que toco nel Velcro, tresmitióme una manera mui natural de sentir y practicar l’asturianu.

Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?

Creo que naide debería sentise culpable por escuchar cualquier tipu de música, pero entiendo lo que quies preguntar. Hai coses que son droga mala pero tómeslo igual, como BB Trickz , Yung Beef o Ben Yart.

¿A qué personaxe públicu convidaríes a un conciertu tuyu, a pasar llueu pel backstage y pa qué?

A cómicos, como por exemplu los que faen el programa de La Resistencia, y pa echar rises, que me presta. Anque prefiero a los mis colegas pa echar rises, pero en confianza.

Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?

Cuéstame esta pregunta porque la verdá que nun tengo muncha cultura de lliteratura n’asturianu, pero puestos a imaxinar, taría bien un cómic de mitoloxía asturiana con un toque ciberpunk fechu por Berto Peña.

Sienti a Tasio y El Velcro en Spotify