Jairo Pérez García, Maribel González Morán, Manuel Roza Llera, Lucía Díaz Rodríguez, Alicia Villanueva Megido y Sergio Menéndez Fernández son los seis intérpretes que van subir al escenariu del Teatru Auditoriu de La Pola Siero esti vienres 15 de payares a les 19h na segunda semifinal del Premiu Obdulia Álvarez La Busdonga d’Asturianada. La Conseyería de Cultura, Política Llingüística y Deporte convoca esta reconocencia destinada a promover y difundir la canción asturiana, una de les manifestaciones culturales más significatives del país que se declaró Bien d’Interés Cultural de calter inmaterial en 2015.
Jairo Pérez García. ye de Piloña y recuerda que, con namás seis años, empezó a preparase pa ser un gran campeón de la mano de Narciso Fernández Arduengo. Con 10 años debuta nel Concursu y Muestra de Folclore Ciudá d’Uviéu y entra nel mundu de los concursos pela puerta grande, faciéndose col primer puestu na categoría xuvenil. D’entós p’acá sigue formándose baxo’l maxisteriu d’Isaac Sierra.
Maribel González Morán ye natural de Llaviana y entama a cantar asturianada «un poco en serio» va 10 años, porque la canción foi una afición que cultivó dende neña. Foi so padre’l que-y metió’l gustu pola canción asturiana y dio los primeros pasos xunto a José Antonio González «El Cantu la Vara». Les sos ganes de deprender averáronla a la Escuela Municipal de Música d’Uviéu, onde aumenta los sos conocimientos musicales anguaño. La casualidá fixo que se cruciare col maestru Joaquín Pixán y qu’entamaren xuntos un proyectu que-y ta dando munches satisfacciones.
Manuel Roza Llera llega dende Lliberdón, nel conceyu de Colunga, y la so afición pola asturianada vien-y pela parte de so güelu maternu. De neñu yá mostraba cualidaes y participaba nos festivales de la escuela entonando dalguna asturianada, pero foi’l so alcuentru con Narciso Fernández Arduengo, nel añu 2001, lo que lu fixo convertir aquella afición de rapacín en daqué más serio y empezar a preparase y participar nos sos primeros concursos. Primero n’aficionaos, onde algamó resultaos perbonos, y depués na categoría absoluta nos principales concursos del país, onde siempre tuvo bones clasificaciones.
Lucía Díaz Rodríguez ye una de les semifinalistes na categoría moza y ye de Llaviana. Con namás seis años aficionóse a la canción asturiana viendo los programes d’asturianada na TPA xunto a so pá y so güelu, y convenció a la familia pa que la apuntaren a clases con Marisa Valle Roso en La Pola. Un par d’años depués debuta en La Nueva y arranca’l viaxe pelos concursos asturianos, onde algama bones clasificaciones. Dende los 14 años recibe clase de José Antonio González «El Cantu la Vara», que ye’l so gran referente y, amás de cultivar l’asturianada, dedica parte del so tiempu al acordión y participa na Banda d’acordionistes de Villoria.
Alicia Villanueva Megido ye’l meyor exemplu de cómo la constancia y el trabayu siguíu fai al artista recoyer frutu. Dende los 5 años entra en contactu col folclore na Asociación Cultural Los Yerbatos de Bimenes, na qu’empieza baillando y na que, a los 8 años, arranca la formación como intérprete de canción asturiana siguiendo les directrices d’Anabel Santiago. Al pocu tiempu, entra en contactu colos concursos d’asturianada y empieza a destacar nes muestres y nes categoríes moces. Dende qu’arrancó, enxamás abandonó la competición nin la formación, que considera imprescindible.
Sergio Menéndez Fernández heredó l’afición pola música asturiana de so güelu maternu, «Gonzalo Mieres», impulsor de la cultura, el deporte y la música asturiana sobre manera en Xixón, anque na so familia tamién hubo grandes voces como les de la bisgüela Consuelo o la de so güela M.ª del Pilar. Empezó na tonada como gaiteru, acompañando a cantadores nos chigres del barriu d’El Llano y adulces foi apeteciéndo-y entonar asturianaes. Púnxose en contactu con Ismael Tomás y foi formándose hasta llegar a poder competir nos principales concursos.
Próximes semifinales
La última semifinal ye’l 22 de payares a les 19h nel Teatru Nuevu de La Felguera, en Llangréu. El 29 de payares el Teatru de La Llaboral de Xixón va acoyer la gala final d’esti certame que va repartir 15.000 euros en tres categoríes: 6.000 euros pa la categoría femenina, 6.000 euros pa la masculina y 3.000 euros pa la de mocedá (menores de 22 años). Con esti premiu nuevu, la Conseyería busca reconocer y valorar «la tradición tan rica de l’asturianada y el llabor d’aquelles persones que caltienen viva esta forma d’arte», amás de «fomentar l’usu de la llingua asturiana, promoviendo la so normalización y espardimientu al traviés de la música». D’esta forma, el xuráu va evaluar el desempeñu de les persones cantantes teniendo en cuenta los criterios que s’especifiquen nes bases que se publicaron nel BOPA. Estos son la conducta y actitú escénica, la entonación y afinación, la calidá d’emisión y dicción vocal, la ornamentación y matización; la dificultá y variedá d’estilos y la calidá llingüística.
Suscríbite a les nuestres novedaes
