L’entamu del cursu yá ta ehí y, dempués de tolos conciertos de branu, son dellos los grupos que tán rematando les grabaciones y fabricaciones pa llanzar nuevos trabayos dende setiembre hasta avientu. La Bedur, Ferla Megía, Llevólu’l Sumiciu, Skama la Rede, Héctor Braga y Herbamora son les seis formaciones que yá confirmaron la publicación de discu nuevu nesti 2024, axuntando una mecigaya estilos que reflexen la diversidá y vitalidá de la música’l país: electrónica, folk de cámara, música tradicional, urbana, punk-ska y folk fusión son, ente otros, los sones que van poder sentise nestos álbumes próximos.
La primera d’estes referencies yá tien fecha de publicación. El 29 de setiembre va ver la lluz en formatu llibru y en plataformes dixitales el trabayu homónimu de La Bedur. Nél van sonar catorce pieces de «música tradicional reellaborada na manera contemporánea», como comenta’l flautista de la formación, Miguel R. Monteavaro. «Son too temes recoyíos de la tradición oral o escrita de los cancioneros del sieglu XIX y XX; iguaos con violín, flauta y piano pa da-y una sonoridá un pelín diferente a la del resto de grupos de la escena actual». Una amuesa d’ello pue vese nel videu «Busmargalín«, que’l tríu estrenó pa promocionar el crowdfunding qu’entamaron.
«Una esbilla de seis cantares de los más de trenta que llevo grabaos dende 2022, composiciones propies y dos temes tradicionales: el Bele bele y un Son d’Arriba». Eso ye lo que-y va dar forma al tercer EP de Ferla Megía. El xoven intérprete qu’amesta música urbana, tradicional, pop, canción d’autor y electrónica va entamar a sacar cenciellos «a primeros de setiembre» pa da-y forma a esta referencia prevista pa payares. «Inda nun pensé nel nome, pero será daqué rellacionao colos páxaros, que tamién van tar presentes nesti EP», comenta’l músicu.
La Llobera ye’l títulu que va tener el segundu EP del dúu d’electrónica de raigañu Llevólu’l Sumiciu y que «van ser cinco cantares rellacionaos cola vida d’Ana García (La Llobera)», como comenta Pablo Alonso, ún de los dos hermanos que forma esti proyectu. «Divina» ye’l primer cenciellu del trabayu qu’asoleyaron el pasáu xunetu y qu’anticipa lo que va recoyer musicalmente: «xéneros electrónicos nuevos como’l footwork o’l garage, amás de siguir indagando n’otros como’l reguetón». Payares ye la fecha prevista de publicación d’una referencia col que’l dúu va estrenase «en formatu físicu per primer vegada» y al que va acompañar «dalgún videu más».
De les nueves músiques asturianes pasamos al rock astur. En 2004 Skama la Rede dieron el so primer conciertu y por ello van sacar un discu-llibru pa celebrar dos décades de ska-punk. «Van ser cuatro cantares nuevos y una versión nueva de los cuatro qu’asoleyemos en formatu dixital nel 2019», desplica Miguel Fernandi ‘Burilo’, vocalista de la formación. Nellos van cuntar coles collaboraciones de Ramón Blanco (Los Berrones), Pirri (Escuela de Odio), Humber Sierra (Misiva), Daviz Rodríguez (Mala Reputación) y Raquel (Ochobre) y, como añade’l cantante, «el discu va venir acompañáu d’un llibru con testos de delles persones cercanes al grupu (d’Asturies y de fuera) y d’una escoyeta de semeyes históriques». Anque entá nun hai fecha de publicación «de xuru que va ser primero d’acabar l’añu».
«Esti discu ye de folk, va tener melodíes virtuoses con electrónica y cantares n’asturianu alrodiu la mitoloxía y historia cola gaita rabil como filu conductor pa remanar esti instrumentu pocu vistu na escena de música celta». Con estes palabres desplica Héctor Braga les característiques del que va ser el so octavu trabayu, Rabil. «Llobatu» y «Valiente» son los dos singles que’l multiinstrumentista llangreanu yá adelantó y pa sentir l’álbum completu va haber qu’esperar hasta avientu.
La última d’estes seis referencies supón el regresu discográficu d’Herbamora dempués de 11 años. Paula Cristóbal Casu, una de les vocalistes y pandereteres qu’integra esta formación de música tradicional desplica qu’esti tercer trabayu vien con dos puntos a destacar: «per una parte, introducimos la electrónica p’acercanos a soníos más actuales y, per otra, facemos una revisión de les lletres tradicionales que falen sobre l’amor románticu, desmitificándolu y evocando l’empoderamientu de la muyer al traviés del amor propiu». Entá nun hai nome del discu pero lo que sí que confirma ye que van asoleyalu «a finales d’añu, nel mes d’avientu».
Suscríbite a les nuestres novedaes
