Felpeyu, una de les bandes imprescindibles del folk asturianu, torna con material discográficu nuevu. Pasaron ocho años dende qu’asoleyaren el discu de llarga duración Cerquina, cinco del llanzamientu del cenciellu Saltones Expósitos y nunos díes acaba la espera. El vienres 29 d’agostu va salir en toles plataformes musicales Si quies que baille contigo, un EP formáu por dos temes nuevos, ún cantáu y otru instrumental.
‘Como te digo una cosa…’ y ‘Si quies que baille contigo’ son les dos obres que van formar esti trabayu del que tovía nun s’anunciaron más detalles. La formación actual que fixo la grabación ta integrada por Alberto Ablanedo (buzuki y coros), Ruma Barbero (bodhrán), Aníbal Menchaca (baxu y voz principal), Luis Nicolás (guitarra y coros), Diego Pangua (flauta, gaita y trompa) y Lisardo Prieto (vigulín y coros).
Si quies que baille contigo ta grabáu en TUTU Estudios con Sergio Rodríguez como técnicu de soníu. Tamién fai la producción y mezcla xunto a Felpeyu y la masterización ye de Dani Sevillano. La portada -adelantada n’esclusiva por MUSICASTURIANA.COM- ye autoría de Ruma Barbero.
Suscríbite a les nuestres novedaes
