Ferla Megía ta acabante d’estrenar el so nuevu videoclip, ‘tiempu !’, una obra audiovsual creada pol xoven realizador Antonio Llaneza pa poner imáxenes al cantar qu’abre l’últimu EP d’esti músicu, Páxaros 02. Amás, l’artista multidisciplinar anunció apocayá los sos próximos conciertos n’Asturies, con ocho feches nes que va percorrer el país d’occidente a oriente.
El videoclip de ‘tiempu !’ supón un acompañamientu visual pa esti viaxe sonoru de Ferla Megía que va dende lo sele hasta lo xabaz y que bebe de soníos que caleyen pente’l jersey club, l’urban, l’ambient y el reguetón. Nesta obra audiodisual, Llaneza somórguiase nel imaxinariu de Megía pa firmar un trabayu en blanco y negro -como tolos otros qu’asoleyó’l músicu sierense-, con planos recoyíos en delles zones de la xeografía asturiana. Ente elles rescampla l’embalse de Tañes y el so embarcaderu en forma de ‘T’ y l’entornu del Valle Turón, onde vive na actualidá’l músicu.
Cola publicación d’esti videu, Ferla Megía sigue dando novedaes rellacionaes cola so última referencia, un trabayu que tamién vio apocayá la lluz en formatu físicu nuna edición llimitada en vinilu y en CD qu’axunta los sos EPs Páxaros 01 y Páxaros 02. Amás, anunció hai unos díes los sos próximos conciertos n’Asturies: 30 d’abril en Mieres, 7 de mayu en Valdés, 9 de mayu en Llanes, , 15 de mayu en L.lena, 7 de xunu en Villaviciosa, 12 de xunu n’Avilés, 20 de xunu n’Uviéu y 27 de xunu en Cabranes.
Coincidiendo col estrenu d’esti videoclip nuevu, el Teatru Xovellanos de Xixón publicó tamién l’actuación en directo que Ferla Megía dio dientro de ciclu Encaja2, celebrada’l pasáu 4 de marzu y na qu’escosó l’aforu. Nella, l’artista mozu interpretó un set de 40 minutos que repasa delles de les sos composiciones nueves y vieyes.
Suscríbite a les nuestres novedaes
