Yá ta en toles plataformes musicales el cenciellu y en YouTube’l videoclip de ‘Conseyu‘, un tema de Ferla Megía con collaboración de Tania Pereira. Esti cantar va formar parte de Páxaros 02, el segundu EP de Megía, y amuesa una sonoridá bien orixinal dientro de la música n’asturianu. Nél pue sentise electrónica, pop y canción d’autor con una lletra enllena de sensibilidá.
«El tema surdió porque taba un día viendo Instagram y saltóme un videu de Tania Pereira tocando y cantando un cantar suyu; entós púnxeme a samplealu y salió esti beat tan guapu, rollu The XX o Fred Again«, desplica Ferla Megía al rodiu l’orixe del cantar. «Pasé-ylo, moló-y, falamos de facer un tema xuntos y nun par de sesiones na mio casa finámoslu», añade.
D’esta «casualidá» de les redes sociales que fixo que naciera ‘Conseyu’ fala tamién Tania Pereira: «nesi videu que salía yo tocando la guitarra na montaña taba tocando ‘Rousa de Xericó’, que ye’l cantar que da nome al mio discu. Y la lletra yera d’otra canción mía qu’al final nun llegó a nengún llau, asina qu’uséla na mio parte pal tema con Ferla», comenta Pereira. Tamién sorraya que ye la so primer «collaboración oficial» y, amás con un artista del que-y «gusta muncho lo que fai». «Foi mui fácil trabayar con él y respeto muncho’l so trabayu porque hai muncha dedicación puesta», añade.
«Creo que los dos venimos de la mesma cuna, d’autores acústicos y productores como Bon Iver, y conectamos muncho; sobre too na manera que los tenemos de tocar la guitarra, con afinaciones abiertes y una sensibilidá bastante asemeyada», camienta la cantautora canguesa sobre los puntos en común con Ferla Megía. Esti alcuentru ye una realidá y ‘Conseyu’ amuesa lo bien que s’entemecen les dos propuestes.
Suscríbite a les nuestres novedaes
