El Conceyu d’Ermua, n’Euskadi, abrió la convocatoria de la XXI edición del concursu Folkez Blai, una cita yá consolidada dientro del circuitu estatal de música de raigañu y que sigue apostando pol sofitu a les bandes emerxentes del folk. Organizáu dende l’área de Cultura municipal, el certame tien como oxetivu dar visibilidá a proyectos que trabayen dende la tradición, tanto dende una perspectiva fiel como dende plantegamientos más contemporáneos.
El plazu pa participar ta abiertu del 15 de marzu al 15 de mayu, y les formaciones interesaes van tener qu’unviar una grabación con cuatro temes —siendo polo menos dos d’ellos propios— xunto con material informativu del grupu, como establecen les bases. N’ediciones anteriores, grupos asturianos como Algaire, Entós, Matazúa, Vrienden o Picarós participaron nesti eventu.
El concursu estructúrase en dos fases. Na primera, un xuráu va escoyer seis bandes finalistes ente toles propuestes recibíes. Estes van actuar en directo n’Ermua los díes 11, 12 y 13 de setiembre, nuna segunda fase abierta al públicu. Como ye habitual, los conciertos van cuntar tamién cola presencia d’una banda convidada de trayectoria reconocida y del grupu ganador de la edición anterior, reforzando’l papel del festival como escaparate del folk actual.
El fallu del xuráu va dase a conocer na última xornada del certame. El concursu contempla un primer premiu de 3.500 euros y un segundu de 2.000 euros, amás de la posibilidá d’actuar na siguiente edición como grupu ganador. Amás, les bandes finalistes que nun resulten premiaes van recibir una ayuda de 500 euros pa cubrir gastos de desplazamientu, facilitando la participación de grupos de distintos territorios.
Suscríbite a les nuestres novedaes
