Fontoria asoleya’l teaser adelantu del so tercer discu, ‘Sirio’
Esta seronda va salir a la cai ‘Sirio‘, el tercer discu de Fontoria tres d’asoleyar “Nordés” (2019) y “El máxicu viaxe de Fionna de Morlay” (2020). Pa que la espera seya más curtia, la banda piloñesa de folk progresivu llanza un teaser d’adelantu y anuncia dellos de los detalles d’esti álbum que va tener 2 CDs. «Nel discu 1 xugamos cola esperimentación cola música de raigañu, dando llugar a una obra instrumental de 74 minutos na que l’oyente va descubrir una mecigaya de soníos que van dende los sones tradicionales de dellos llugares del mundu, a los ritmos electrónicos, la lírica, el rock progresivu o la música de cámara», desplica Maxi Areñes, cabezaleru de la formación.
Amás d’esta ambiciosa obra instrumental que forma el CD 1, Areñes comenta que’l discu 2 «tien una duración de 50 minutos y ta enllenu de pieces d’orixe tradicional qu’aporten de llugares como Asturies, Bretaña, Escocia y, en xeneral, tol Arcu Atlánticu». Tamién hai temes de composición propia, anque marcaes por tener «un calter tradicional», como sorraya’l músicu del grupu de folk progresivu.
Otra de les novedaes son les numberoses collaboraciones del trabayu. D’esti mou, la soprano Susana Gudin (Taranus), el multiinstrumentista Pablo Canalís, los flautistes David Fernández y Iván Emo y el baterista Xosé Ánxel Allende, encárguense d’aportar la so esperiencia en delles de les pieces de ‘Sirio’.
