Fruela 757 asoleya ‘Fabril’, el so décimu álbum
Yá ta disponible en bandcamp ‘FABRIL‘, la décima referencia de Fruela 757. Dos años depués d’asoleyar el so anterior llarga duración, ‘Llariegu’, el productor xixonés regresa con un trabayu formáu por 14 temes nos qu’esperimenta con nuevos soníos dientro de la electrónica de raigañu.
«Pa FABRIL quixi trabayar con ritmos más “trad” y melodíes propies, a parte del sampléu y el fruelismu de siempre. Ye un poco coyer lo tradicional, los instrumentos y les voces, y facelo con maquinines y sintes. La idea ye la xente diendo a les ciudaes a trabayar, cómo cambia la so vida y la so rellación col folclor y la tradición. Y cómo podría cambiar del mesmu mou lo tradicional nesi viaxe», comenta Javi Suárez -la persona detrás de Fruela 757– sobre esti trabayu.
“SXGAR_CON_XEITU”, “XOTX’L_TRAPX, “SALTXN_NAGISA“ y “MXÑEIRX_PA_BT” fueron los adelantos de ‘FABRIL’, a los qu’agora se suma’l videu nuevu de la “XOTX_D’ENSIDESA“. Pal DJ xixonés esti álbum tien una continuidá estética: «llévolo a los 70-80, que ye la época d’eclosión de la electrónica, non namás a nivel musical -con soníos de sintes clásicos de la época, arreglos y demás…-, sinón tamién a nivel visual». Y musicalmente tien novedaes como temes 100% instrumentales, amás de la incorporación de caxes de ritmos y sintes que faen el soníu d’instrumentos tradicionales, una idea na Fruela 757 lleva tiempu trabayando y de la que yá falara nesta entrevista del Anuariu de la Música Asturiana 2019.
Diez trabayos en bandcamp
Fruela 757 ye una de les propuestes más orixinales de la música’l país. Nel so repertoriu suena ReggaeToná, HipFolk, DrumAmbás… o lo que ye lo mesmo, música popular asturiana amestada a soníos internacionales de la música urbana del sieglu XXI como’l hiphop, el reggaeton o la electrónica. El productor xixonés Javi Suárez formó esti proyectu en 2008 y hasta la fecha tien publicaos en bandcamp 10 llanzamientos, amás de delles sesiones en directo. Tamién ye’l DJ qu’acompaña y produz a Anabel Santiago nesta última dómina na que la cantante vuelve a esperimentar cola música electrónica.
