Baxel presenten esti xueves en Llanes ‘El Cantar del Simpatías’
El 30 d’ochobre salía a la venta en CD y en toles plataformes dixitales ún de los trabayos discográficos más esperaos del 2021: ‘El Cantar del Simpatías’. Ye’l primer discu que’l guitarrista, bouzuquista y cantante Paul Balmori y el flautista y gaiteru Rigu Suárez -dambos miembros de Corquiéu-, publiquen baxo’l so nuevu proyectu musical: Baxel. Tres presentalu en conciertu na Casa la Cultura de Ribeseya, el dúu ufre un nuevu conciertu esti xueves 3 a les 20h nel Centru Cívicu de Posada (Llanes).
«Ye un discu que pretende rescatar y caltener vivu’l repertoriu tradicional de Ribeseya y la memoria de los sos informantes», comenta Rigu Suárez sobre los diez temes que dan forma al CD. Nesti sen, el músicu añade que «el repertoriu d’esti trabayu ta formáu nun 80% por temes tradicionales de Ribeseya, na so mayoría inéditos d’archivos propios y d’otros del ATOAM d’Ambás y Ramses, anque tamién aportaron archivos de collacios de Ribeseya».
La diversidá ye otra de les característiques del álbum. Suárez destaca que nel CD «hai munches Xiraldilles, baille mui propiu del conceyu, de calter y temática marinera» , amás de dances, xotes, alboraes, ramos, xotes, o aires, ente otros xéneros. Tamién hai espaciu pa melodíes propies y incluso pa la reinterpretación de partitures del sieglu XX: «Ficimos una recopilación de Xiraldilles del Cancioneru Torner que grabamos cuasi ensin modificar y rescatamos una partitura de 1915 del cupletista Juan Martínez Abades dedicada a la Marquesa d’Argüelles», añade’l flautista y gaiteru.
“El Cantar del Simpatías” presentóse en directo’l sábadu 30 d’ochobre na Casa la Cultura de Ribeseya -pue vese un videu resumen equí-, anque con un aforu llimitáu a les 100 persones que teníen invitación pal eventu. Sicasí, Rigu Suárez esclaria que Baxel va pisar más escenarios, tanto na so «máxima espresión» cola participación de los collaboradores que tán nel discu –Xosé Antón “Ambás”, Pepín de Muñalén, David Varela, Richar García, Josep María Ribelles y Sergio Rodríguez-, como «nun formatu más reduciu». L’actuación d’esti xueves en Posada, ye una bona oportunidá pa poder ver a la formación nesti últimu formatu.
