Oxetivu algamáu en trés díes. Gracies al sofitu de decenes de persones nuna campaña de micromecenalgu la banda gaites de les cuenques mineres, Gaiteros del Carbón, confirma los actos centrales del so X Aniversariu. Estos van incluyir un conciertu especial con delles collaboraciones y una esposición retrospectiva que recueye la historia d’estos diez años de camín. La cita va ser el sábadu 10 de xineru de 2026, a les 20h, nel Teatru José León Delestal de La Felguera, un escenariu emblemáticu del Valle del Nalón que va acoyer una xornada mui destacada.
Nesti actu, Gaiteros del Carbón van tar acompañaos por trés músicos asturianos de reconocíu prestixu: Rubén Bada (guitarres), Juanjo Díaz (batería y percusiones) y Ramón Prada (teclaos y baxu), que se va encargar, xunto col director de la banda Pablo Carrera, de los arreglos y la dirección musical. Tamién van participar artistes convidaos, ente los que yá ta confirmáu’l conocíu grupu castellanu Celtas Cortos y los míticos Nuberu, que van compartir escenariu cola banda gaites nesta celebración tan señalada.
Amás, dempués d’algamar el primer oxetivu con éxitu, la Gaiteros del Carbón plantega un segundu oxetivu de 5.000 euros col fin d’ampliar la producción del conciertu, meyorar los materiales de la esposición y dar prioridá d’asientu a tolos mecenes nel Teatru José León Delestal. “Ver que llegamos tan llueu al primer oxetivu demuéstranos el sofitu y el cariñu de la xente. Agora queremos siguir medrando y facer que los mecenes sientan esta celebración como suya», espliquen dende la formación.
Dende’l so estrenu en 2016, Gaiteros del Carbón llevó la so música per decenes d’escenarios, fiestes y festivales, collaborando con artistes como Marisa Valle Roso, Dixebra, Los Berrones o Celtas Cortos. La banda ye güei un símbolu de les cuenques mineres y del valor de la cultura popular como forma de memoria y identidá colectiva. La campaña de micromecenalgu sigue activa en Verkami, onde cualquier persona pue collaborar y formar parte d’esta celebración de los 10 años de Gaiteros del Carbón.
Suscríbite a les nuestres novedaes
