El pasáu 8 y 11 d’avientu, Llaboral Ciudá de la Cultura (Xixón) convirtióse nel epicentru de la tradición y diversidá musical. La celebración de les Xornaes de la Música Tradicional Asturiana. Escueles de música tradicional y retos de la cultura asturiana de la gaita, entamaes pol Conceyu de la Gaita y la Conseyería de Cultura, Política Llingüística y Deporte, reunió a intérpretes, constructores, investigadores y amantes de la música tradicional para rendir homenaxe a un instrumentu que tresciende fronteres: la gaita.
«La xornada del día 11 entemeció música, historia y diálogu, amosando cómo la gaita, en toles sos formes, sigue viva y en constante evolución»
La xornada del día 11 entemeció música, historia y diálogu, amosando cómo la gaita, en toles sos formes, sigue viva y en constante evolución. Dos conciertos marcaron la xornada: l’alcuentru internacional Gaites del Mundu y la presentación del discu nuevu de la Banda de Gaitas Llacín, Resollu, que sirvió como pieslle de les xornaes.
A les 17 hores la Sala de Pintures de La Llaboral acoyó un conciertu que llevó al públicu per un percorríu musical a traviés de Galicia, Escocia, Bélxica, Italia y Asturies. Cola presentación del gaiteru Rodrigo Joglar, l’alcuentru Gaites del Mundu permitió descubrir la riqueza y variedá de les gaites europees, tanto nel so soníu como na so construcción y repertoriu.
«La Sala de Pintures de La Llaboral acoyó un conciertu que llevó al públicu per un percorríu musical a traviés de Galicia, Escocia, Bélxica, Italia y Asturies»
L’asturianu José Manuel Tejedor foi l’encargáu d’abrir el conciertu con dos conxuntos de pieces nes que sonaron melodíes emblemátiques como ‘El Machaquito’, la ‘Xota’l Centru’, o’l ‘Floréu de Remis’. La so interpretación, enllena de virtuosismu, recibióse con una ovación calurosa.
L’escocés Fred Morrison continuó’l viaxe cola inconfundible Great Highland bagpipe, enllenando l’espaciu col so característicu timbre. Na segunda parte de la so actuación, camudó la intensidá sonora de la gaita pola delicadeza del low whistle, creando un ambiente íntimu y emotivu.
Dende Galicia, el gaiteru y compositor David Bellas ufrió un repertoriu que xunció investigación y creatividá. Interpretó melodíes medievales y renacentistes con gaites de tipoloxíes estremaes, recreaes a partir de fontes iconográfiques históriques. Amás, presentó composiciones propies y melodíes pertenecientes al repertoriu gallegu qu’amosaron l’amplitú y riqueza sonora de la gaita gallega.
El belga Jean-Pierre Van Hees, músicu y investigador, aportó con elegancia. Autor del llibru Cornemuses: Un infini sonore (2014), Van Hees presentó na primer parte la musette de cour, instrumentu de la corte francesa del sieglu XVII, interpretando pieces d’Hottererre y Chédeville. Na segunda parte, introduxo al públicu nel soníu de la gaita belga, llamando l’atención pol so particular diseñu colos bordones orientaos p’hacia’l públicu.
El broche del conciertu aportó cola Zampognaòrchestra, cuartetu italianu llideráu por Giuseppe Moffa, que cuntaba con una zampogna en sol, de timbre grave y profundu. El so repertoriu viaxó dende un fragmentu de la ‘Pastoral’ de Beethoven hasta una enérxica tarantela, pasando per una versión de ‘Satisfaction’ de The Rolling Stones. El momentu más emotivu llegó cola so interpretación del ‘Asturies, Patria Querida’, con una partitura qu’entregaron al Conceyu de la Gaita como símbolu de la unión musical ente cultures.
«Gaites del Mundu foi una demostración de cómo la gaita conecta pueblos, estilos y époques. Nun escenariu únicu convivieron la música tradicional, la culta y la popular»
La xornada remató nel Teatru de La Llaboral cola presentación del trabayu discográficu nuevu de la Banda Gaites Llacín, entituláu Resollu. Presentáu por Luis Pola, el conciertu cuntó cola intervención de Pablo León Gasalla, Director Xeneral de Cultura y Patrimoniu, quien destacó la importancia d’estes xornaes como espaciu d’alcuentru y promoción de la gaita asturiana.
El conxuntu apostó por un vestuariu sobriu, cediendo protagonismu a la música. El repertoriu entemeció pieces tradicionales y composiciones nueves dientro d’un marcu conceptual coherente. Resollu continúa la identidá sonora de la banda iniciada con Tornallás (L’Aguañaz, 2002) y continuada en Xideres (L’Aguañaz, 2008), señaló Vítor Carbajal, director de la banda gaites. La collaboración de destacaos músicos asturianos como Dani Álvarez, Pepín de Muñalén, Lluci Palomares, Kiko Flores o Felpeyu arriqueció la sonoridá de l’agrupación.
L’etnógrafu Xosé Antón Ambás participó interpretando ‘Santa Marina de Parres’ y ‘Danza de Ponga’, recordando la importancia de la tresmisión oral de los nuestros mayores pal caltenimientu del repertoriu. Tamién intervino’l Grupu Etnográficu L’Oriente, dirixíu por Santi Galguera, qu’acompañó con dances, muñeires y saltones, dando dinamismu y continuidá a la tradición.
Cuando paecía que’l conciertu terminara, el telón volvió a abrise pa facer en forma de bis dos pieces más: ‘Los fayeos de mayo’ y ‘Resollu’. N’acabando esta última, que cuntó con una danza final encabezada pol GE L’Oriente y na que participaron Xosé Antón Ambás y Lluci Palomares, fíxose una semeya de familia cola que tanto los músicos como’l públicu recordará’l conciertu.
Les Xornaes de la Música Tradicional Asturiana. Escueles de música tradicional y retos de la cultura asturiana de la gaita zarraron asina una edición especialmente significativa pa la música tradicional asturiana y la comunidá gaitera. Amás de los conciertos, les xornaes incluyeron meses de diálogu sobre’l papel de les escueles de gaita, l’artesanía y la presencia femenina na comunidá. Les gaiteres participantes compartieron les sos esperiencies y reivindicaron mayor visibilidá nun entornu históricamente masculinu.
La Conseyera de Cultura, Vanessa Gutiérrez, reafirmó’l compromisu del Principáu d’Asturies cola protección y difusión d’esti llegáu, recordando que ta ellaborándose un informe pa que la cultura de la gaita asturiana seya reconocida como Bien d’Interés Cultural de carácter inmaterial.
La música, el diálogu y la collaboración foron los verdaderos protagonistes d’unes xornaes qu’amosaron que’l futuru de la gaita escríbese dende’l respetu, la diversidá y la unión.
Suscríbite a les nuestres novedaes
