Los díes 14, 15 y 16 d’abril celébrase la tercer edición de Música en Rede, les xornaes profesionales entamaes pola Conseyería de Cultura, Política Llingüística y Deporte -a traviés de Cultura en Rede- nes qu’hai meses de debate (Conxustes), presentaciones (Rolda), talleres formativos (Erbíes), showcases (Llabor) y puntos d’asesoramientu (en rede) pa que «artistes, profesionales y públicu tengan oportunidá d’interactuar y texer redes, amás de ser un escaparate pa visibilizar, dinamizar y profesionalizar la música emerxente fecha n’Asturies».
Pa esta tercer edición yá ta abiertu‘l plazu de recepción de propuestes musicales pa facer un showcase dientro de Llabor. La fecha tope pa presentar candidatures ye’l próximu llunes 22 d’avientu a les 23:59 y pue facese a traviés del rexistru electrónicu de Cultura en Rede. Hai previstes doce actuaciones con una duración d’ente 30 y 40 minutos y n’horariu de 18.30h a 22.30h. Les amueses van tar remuneraes con una cifra d’ente 500 € y 2.000 € -más otros 250 € por técnicu-, van tar dotaes de la infraestructura técnica necesaria y pueden facese nestos espacios: Paraninfu de La Llaboral, Teatru de la Llaboral, Sala Albéniz, Sala Acapulco y otros posibles espacios singulares.
Los detalles de la convocatoria tán disponibles na web d’Asturies Cultura en Rede, onde tán disponible les bases cola información al completu. Nelles detállense toles condiciones económiques y técniques y dase la información sobre’l procesu de valoración de les propuestes recibíes, nel que destaca que nun van repetise proyectos que yá actuaren na edición anterior, que van priorizase los que tengan un llanzamientu nuevu y/o compuestu en 2024 o 2025, que compongan temes de creación propia y usen l’asturianu o gallego-asturianu nes lletres.
Na semeya, L-R actuando nún de los showcases hai unos años.
Suscríbite a les nuestres novedaes
