Gonzalo Fernández Ruiz de Zuazo: «¿Qué importancia tien la música fuera d’Asturies como tresmisora de la identidá?»
¿Qué importancia tien la música fuera d’Asturies como tresmisora de la nuestra identidá? La respuesta curtia ye UNA IMPORTANCIA BIEN GRANDE. La respuesta llarga y xustificada científicamente son el desendolcu y les conclusiones del mio trabayu de fin de máster, EL CENTRO ASTURIANO DE MADRID (1881.-). Práctica musical y expresiones identitarias.
Una de les hipótesis principales que se planteen nesti trabayu, ye que la música foi un pegoyu pal desenvolvimientu y caltenimientu d’esta institución, como casa asturiana más vieya del mundu y como claro exemplu de la unificación social d’asturianos na capital d’España.
Pero… ¿cómo influyó la música nesta unificación?
Ensin duldes, influyó abondo.
«Dalgunes muestres iconográfiques anteriores a la fundación del Centro de Asturianos, yá presenten a grupos de persones baillando alredor de la figura d’un gaiteru a orielles del ríu Manzanares»
Dalgunes muestres iconográfiques anteriores a la fundación del Centro de Asturianos, yá presenten a grupos de persones baillando alredor de la figura d’un gaiteru a orielles del ríu Manzanares. Lloñe de coincidencies de los sos retratistes, son un puntu de partida interesante pa la mentada xustificación, que gana pesu en 1881 cola fundación institucional y progresiva presencia d’una bayurosa actividá musical y sociocultural.
Na programación musical del Centro Asturiano de Madrid tuvieron presencia y influyencia nesta primer etapa importantes figures como Ramón de Campoamor, Juan Menéndez Pidal, Vital Aza, Ramos Carrión o Eduardo Martínez Torner ente otros.
«El conceptu de “asturianía” presentóse na actividá socio-musical del Centro Asturiano de Madrid, n’especial a traviés de les sos agrupaciones musicales y repertorios»
Dende los años 50 del sieglu XX y col cambiu de paradigma ocasionáu pola Guerra Civil, evoluciona’l panorama musical del Centro Asturiano de Madrid, n’especial col surdimientu de les agrupaciones musicales de les que caltienen la so actividá el coru “Ecos”, la banda gaites “El Centru” y el grupu de baille “L’alborá”.
Dalgunes personalidaes d’importancia dientro del ámbitu musical asturianu qu’influyeron y/o participaron na actividá d’estes agrupaciones nes últimes décades del sieglu XX, foron José Rodríguez Fernández «El Maestro Casanova», Manuel Rodríguez Osorio «Manolo Quirós» o Antolín de la Fuente Clá como directores, intérpretes o arreglistes de los sos repertorios.
«Apostando en primer llugar por too aquello que conlleva una identidá cultural propia nel sentíu ampliu del términu “asturianía”, onde la música ye ensin dulda un factor imprescindible»
El conceptu de «asturianía» presentóse na actividá socio-musical del Centro Asturiano de Madrid, n’especial a traviés de les sos agrupaciones musicales y repertorios, considerándose como importante esponente nesti aspectu y dende’l puntu de vista del repertoriu, la recuperación del himnu del Centro Asturiano de Madrid «Ausencias de la tierrina», con música d’Antolín de la Fuente Clá y testu de José León Delestal; obra que dende la disolución del Cuarteto Asturianía en 1999 tuviera guardada nel archivu institucional ensin volver a interpretase.
Equí va una esbilla de la lletra:
Herido vas de Asturias asturiano,
donde quiera que vayas a vivir.
De ausencias de la tierrina,
tengo el corazón herido.
Cuanto más lejos de Asturias,
mas llevo a Asturias conmigo.
¿Quién me curara esta herida
con la que muriendo vivo,
que si la canto me duele
y me mata si la olvido?
Y agora… ¿cómo pue caltenese anguaño esta asturianía nos centros asturianos de la diáspora? Anque algamar esti afectu de comunidá nun ye fácil por mor de la fugacidá dixital y facilidá d’averamientu con Asturies na actualidá, la respuesta ye bien fácil… Aprovechando esta fugacidá y apostando en primer llugar por too aquello que conlleva una identidá cultural propia nel sentíu ampliu del términu “asturianía”, onde la música ye ensin dulda un factor imprescindible, pero tamién por delles práctiques de sociabilidá como puen ser la lliteratura, el deporte, la gastronomía y en definitiva el cuidáu de la nuestra cultura y “tradiciones” nel sentíu ampliu de la palabra. Tamién dende un marcu intelectual académicu, xenerando conocimientu en toles persones asturianes y non necesariamente, pa que conozan la nuestra rica cultura, interésense por ella y sobre manera disfruten d’ella.
¿Vamos ser quién a ello?
