Güei entama en Siero la XLIII Selmana del Folclor Astur

Dende esti llunes 1 y hasta’l sábadu 6 d’abril, La Pola enllénase de baille, música y cultura tradicional gracies a la XLIII Selmana del Folclore Astur qu’entama’l Grupu Folclóricu El Ventolín de Siero. La xornaes arranquen güei a les 20h na sede d’esta agrupación cola presentación a prensa y al públicu en xeneral de les actividaes y la proyección del videu-resume de la edición del añu pasáu. Esti 2024, el protagonismu va ser de talleres d’instrumentos tradicionales, desfile, amueses y el festival de música y baille tradicional.

Mañana, p’acompañar a la mítica festividá de los Güevos Pintos de La Pola, va haber a les 10.30h alborada de gaita y tambor peles cais de La Pola y a les 12h nel Ayuntamientu, dempués de la bendición de los Güevos Pintos, actúa l’alumnáu de la Escuela de Música Tradicional d‘El Ventolín y el grupu de baille. A les 18h entama’l desfile tradicional de Güevos Pintos nel que van participar les agrupaciones G.F.I El Ventolín, Xiranda Brass Band, G.F Principado, G.F El Cuélebre, G.B El Piñote, G.B La Sidrina, y la Bandina Gaites Conceyu Siero en compañía de los cabezudos y los sidros.

Los siguientes díes van tar protagonizaos por dellos talleres d’instrumentos musicales na sede del GFI El Ventolín. D’esta manera, el miércoles 3 hai a les 17h ún de curdión diatónicu impartíu por Nel Sánchez; el xueves a les 17h ún de flauta travesera de madera que dirixe Daniel Álvarez y a les 20.30h ún de tambor asturianu d’Arsenio Ruiz; y el vienres 5 a les 16h ún de gaita de Guillermo Pérez y a les 18h ún de pandereta que pon Laura Ruiz.

Teatru y Festival de música y baille

Amás de les actividaes musicales, el teatru costumista vuelve a tar presente nesta Selmana del Folclor Astur y asina ye como’l 3 d’abril a les 20h, nel Auditoriu de La Pola, el Grupu de Teatru Carbayín estrena la obra “Por un puñáu de castañes”. Les xornaes rematen el sábadu 6 a les 19h nel Auditoriu de La Pola col festival de baille y música tradicional asturiana nel que van participar les Escueles de Música Tradicional de Fitoria, la de la Banda Gaites Villaviciosa-El Gaitero y la d’El Ventolín; amás del GFI El Ventolín y Chino El Indio y Carlos Velasco.

Dexa un comentariu

X