Editorial: «La dignificación del asturianu nos premios musicales estatales»

«Queremos dedica-yos esti premiu a toles y a tolos falantes d’esti idioma milenariu que tán faciendo que siga vivo anguaño y perespecialmente a les y los militantes de la reivindicación llingüística porque gracies al so puxu y al so llabor, dalgún día vamos ver reconocíos los nuestros derechos». «Qué complicado ¿no? Es que si me pongo yo a hablar andaluz no se entera nadie». Xune Elipe y l’artista andaluza Diana Navarro foron los protagonistes d’esta escena que pasó hai 14 años. L’escenariu foi’l Teatru Calderón de Madrid y el contestu la entrega de los XIV Premios de la Música, nos que Dixebra algamó’l de la Mejor Canción en Asturiano con “El cantar de la redención”. La situación ilustra perfectamente’l ningunéu que sigue sufriendo la música n’asturianu nos premios d’ámbitu estatal.

Al añu siguiente aquellos Premios de la Música que concedía la SGAE en collaboración cola IAE desapaecieron y, con ellos, acabó la igualdá que tenía’l nuestru idioma en galardones d’esti calter en comparación con otres llingües peninsulares. Anguaño hai dos exemplos mui claros d’esto: los Premios MIN y los nuevos Premios de la Música creaos esti añu.

«Lo más probable ye que nun sientan un rechazu pa cola llingua asturiana; sinón indiferencia o desconocimientu, que lo que fai ye causar desigualdá d’oportunidaes pa la nuestra escena»

Los Premios de la Música Independiente (MIN) nacieron hai 15 años col oxetivu de reconocer a la música que nun pertenez a les grandes multinacionales del sector. Estos galardones cunten cola estaya de Mejor Álbum en Catalán, Mejor Álbum en Euskera y Mejor Álbum en Gallego; pero ignoren la de Mejor Álbum en Asturianu. Y nun ye namás eso, sinón qu’amás dientro de la estaya de Mejor Letra Original pueden participar cantares escritos nes cuatro llingües oficiales del Estáu, pero non n’asturianu. Manca esta postura; más tovía viniendo d’unos premios creaos pa, ente otres coses, «reconocer la diversidá cultural» y cuando la producción musical n’asturianu ye 100% independiente.

Per otru llau, esti 2024 ye la primer edición de los nuevos Premios de la Música tres la fundación recién de l’Academia de la Música de España. Nellos sí que se contempla a la llingua asturiana, pero difuminada dientro de la estaya Mejor Canción en Gallego/Bable; daqué que nun ye bono nin pa la industria musical gallega nin pa la nuestra. Mención aparte tien que tovía s’utilice la denominación “bable”. Figurámonos la reacción de la industria musical euskaldun y de les sos instituciones culturales si’l so premiu fuera’l de la Mejor Canción en Vascuence

«Tenemos pymes asturianes que formen parte de la UFI y d’AGEDI, artistes asociaos a la SGAE… asina que lo más llóxicu ye qu’Asturies tenga los mesmos derechos. Nesti sen, el Gobiernu Asturianu, el Ministeriu y la escena musical del país habríen de xugar un papel activu p’acabar con esta desigualdá»

Dignidá, igualdá y normalidá

Lo más probable ye que nin la Unión Fonográfica Independiente (UFI) -responsable de los Premios MIN- nin l’Academia de la Música de España sientan un rechazu pa cola llingua asturiana; sinón simplemente indiferencia o desconocimientu, que lo que fai ye causar desigualdá d’oportunidaes pa la nuestra escena

Tenemos pymes asturianes que formen parte de la UFI y d’AGEDI, artistes asociaos a la SGAE… asina que lo más llóxicu ye qu’Asturies tenga los mesmos derechos y la mesma dignidá que les otres Comunidaes Autónomes con llingua propia. Nesti sen, un Gobiernu Asturianu comprometíu cola cultura propia habría xugar un papel activu p’acabar con esta desigualdá; tamién un Ministeriu de Cultura que tien bones pallabres pa la creación cultural en llingua asturiana cuando vien de visita per equí. Y tamién ye responsabilidá de la escena musical del país organizase y pelear polos sos derechos. 

«Rodrigo Cuevas, Nacho Vegas, L-R, La Bonturné y Mapi Quintana tienen nominaciones n’otres estayes. Naguamos por que na edición de 2025 l’asturianu pueda tener más normalidá al cuntar con categoríes propies»

Al marxe d’esta situación anómala, l’asturianu sí que ta presente nestos premios dientro d’otres categoríes. Nos Premios de la Música 2024 Rodrigo Cuevas tien cuatro nominaciones –Álbum del Año, Productor del Año, Mejor Álbum Folclórico y Mejor Gira- y la “Añada de Lea” de Nacho Vegas ta nominada a Mejor Canción en Gallego/Bable. Per otru llau, nos Premios MIN -nos que Rodrigo Cuevas tamién algamó en 2020 los de Mejor Artista Emergente y Mejor Álbum de Músicas del Mundo-, esti añu tienen nominaciones tres proyectos n’asturianu dafechu: L-R, La Bonturné y Mapi Quintana. Dámos-yos la norabona y tol nuestru sofitu, naguando por que na edición 2025 d’estos certámenes l’asturianu pueda tener más normalidá al cuntar con estayes propies nunos premios que dan visibilidá a la música’l país y al idioma acuyá de les nuestres llendes.

Dexa un comentariu

X