TPA estrena güei la tercer temporada de Sonadía, el programa dedicáu a la música fecha n’Asturies que conducen les hermanes Alicia Álvarez y Mar Álvarez de Pauline en la Playa y que ta realizáu por Zebrastur. Nesta ocasión los artistes rellacionaos cola música n’asturianu que van apaecer son Nacho Vegas, PVXARRA -dambos nel episodiu d’esta nueche-, Skama la Rede, La Ciudá nel Mar, Arma X & Jotadejota y Raigañu. Tamién vuelven Rubén Bada, Marisa Valle Roso, Vérsica y Vero Rubio a una temporada qu’aporta con delles novedaes.
Una de les novedaes ye que Sonadía estrena lo que RTPA define como «un fitu nuevu nel procesu de tresformación dixital» de la cadena: «Dende güei a les 20h, coincidiendo col estrenu posterior n’A7 del primer capítulu de Sonadía, van llanzase n’esclusiva en rtpa.es los seis capitulos iniciales de la temporada». Ye un «modelu de distribución Digital First, que prioriza l’estrenu de conteníos nos medios dixitales» y la radiotelevisión pública deféndelu como una manera «d’averase a audiencies nueves y adaptar el consumu dixital a los vezos emerxentes de la ciudadanía».
Amás lo llargo de los 13 capítulos que formen la temporada, Sonadía va repasar otres cuestiones rellacionaes cola escena musical como la puesta n’escena, la música na cai, aniversarios, les muyeres na industria, les sales o l’arquitectura de la producción. Tamién ye nueva la estaya de «Vuelve a…», una sección de pieslle na que tornen al programa artistes que yá pasaron pela primer temporada y qu’asoleyen agora un trabayu nuevu.
D’esta manera, tolos xueves a 23.15h TPA 7 vuelve a puxar por esti programa qu’apuesta por visibilizar la diversidá de la escena sonora fecha n’Asturies y nel que van apaecer un total de 52 artistes de tolos estilos que se faen anguaño nel país.
Suscríbite a les nuestres novedaes
