La banda asturiana de música celta Guieldu va ser una de les protagonistes de la xornada principal del festival Les Roches Celtiques, ún de los alcuentros de temática celta más importantes d’Arpitania, territoriu asitiáu en Los Alpes, repartíu ente los estaos francés, italianu y suizu. La formación va actuar esti sábadu 4 de xunetu nel escenariu principal de Rochetaillée, el pueblu onde se celebra’l día grande del festival, al pie de les ruines del so castiellu medieval. La presencia d’esta banda na cita supón un nuevu reconocimientu a la proyección internacional del grupu y, al empar, una oportunidá pa que la música asturiana suene per primera vegada nesti festival destacáu de la escena céltica francesa.
Cada añu, Les Roches Celtiques despliega la so programación en distintos espacios del conceyu de Saint-Étienne, una ciudá de pasáu mineru que foi afianzando, col tiempu, una clara vocación cultural como parte del so procesu de reconversión. El festival camuda estos escenarios nun puntu d’alcuentru pa músicos, baillarinos y aficionaos llegaos de distintos puntos de Francia y d’otros países europeos.
Con un repertoriu que bebe de la tradición musical asturiana pero bien amestada con sonoridaes contemporánees, Guieldu va compartir cartelu con dalgunes de les principales propuestes del festival precisamente na xornada más multitudinaria del eventu, reafitando’l creciente interés que la música asturiana espierta fuera de les nueses fronteres.
La cita de Saint-Étienne llega dempués de la participación de Guieldu l’añu pasau nel Festival Intercélticu de Lorient, la mayor cita internacional del celtismu que celebrase en Bretaña, onde la formación asturiana tuvo una destacada acoyida per parte del públicu y la prensa. Esti conciertu nuevu n’Arpitania confirma la progresiva presencia del grupu nos principales escenarios europeos dedicaos a la música celta y la so contribución a la difusión de la música asturiana de raigañu.
Guieldu ye una de les bandes más destacaes de la fornada nueva de folk asturianu. Formáronse en 2019 y el pasáu añu publicaron el so primer discu, Memories de Deva, un álbum formáu por catorce temes que percuerren los soníos de raigañu del Arcu Atlánticu, amestándolo a otros estilos como’l folk progresivu, la new-age, el folk rock, el funk o’l smooth jazz. En mayu entamaron la so xira de 2026 que, amás del conciertu d’esti sábadu, tamién los va llevar el 25 de xunetu a les fiestes de Ciares (Xixón) y el 26 de setiembre a Cataluña.
Suscríbite a les nuestres novedaes
