Herbamora estrenen l’espectáculu de ‘286 llunes’ esti sábadu en La Benéfica

El tercer trabayu discográficu d’Herbamora, 286 llunes, va poder sentise en directo esti sábadu 22 de marzu dende les 19h en La Benéfica de Piloña. Va ser, amás, el primer conciertu qu’acueye l’espaciu dempués de la so reapertura’l sábadu pasáu cola celebración del Antroxu en Danza. Elena Rodríguez Martínez, María Gavieiro Álvarez, Paula Cristóbal Caso, Natalia Nuño Rodríguez y María Vázquez Álvarez van xubise al escenariu de L’Infiestu pa presentar esti discu enllenu de presencia y sensibilidá, y que, como despliquen, «paez que ta trayendo sorpreses grates a quien lo siente». Van tar acompañaes por delles collaboraciones y el llabor cuidáu d’escenografía, lluces, proyecciones visuales y vestuariu de munches profesionales.

Herbamora yá daben anuncia del conciertu dende qu’asoleyaron l’álbum. Queríen facelo en La Benéfica porque «ye un espaciu cultural nel rural. Nosotres somos rurales, los cantares q cantamos provienen de los pueblos y ye un espaciu que pa nós representa d’ónde venimos y a ónde queremos dir», comenten les músiques. En baxando del escenariu, l’eventu va siguir con una espicha popular na que la DJ Killaphonia va poner l’ambientación musical. Mesmo que l’espaciu, el formatu ye una decisión plenamente consciente, una declaración d’intenciones: «Paeznos fundamental qu’esistan espacios sociales comunitarios pa que la vida nos pueblos tenga sentíu. Vamos facer una espicha popular onde cada quien pueda traer dalgo pa compartir y cenar toes xuntes, pa lo mesmo, poder socializar en colectivu de forma autoxestionada».

La mestura d’electrónica, percusión, testures y voces que suena del discu requier, como yá comentaron n’otres ocasiones, d’una xera d’adaptación, interpretación y deprendimientu diferente de la que tuvieron que desendolcar na grabación, «munches pieces pa esti puzzle que ta a puntu d’encaxar». Trátase d’un procesu qu’almiten que ta siendo «ilusionante a la par qu’agotador». A la fin, toos estos soníos van poder esfrutase’l sábadu en Piloña. Pa que toles persones que puean averase ensin que les perres sían un impedimentu, la entrada al va ser de baldre, con taquilla inversa, o lo que ye lo mesmo, «el bote de tola vida». Poro, va abrise la posibilidá de facer un donativu si se quier y pue n’acabando la música.