Tres cinco años de camín y de dir asoleyando un cenciellu al añu dende 2022, el primer llarga duración de Guieldu yá ye una realidá. La banda de música celta ta acabante de de publicar en plataformes musicales Memories de Deva, catorce temes que puercuerren los soníos de raigañu del Arcu Atlánticu, amestándolo a otroes estilos como’l folk progresivu, la new-age, el folk rock, el funk o’l smooth jazz. Un cuidáu trabayu qu’entemez temes de composición propia y d’orixe tradicional y que va ver la lluz tamién en formatu físicu‘l 3 d’abril, día en que lu van presentar nel café Trisquel de Xixón con una audición musical comentada.
Memories de Deva ye un viaxe pela mar nel que suenen muñeires, dances, reels, xirandiyes, set irlandeses… a la fin lo qu’ellos definen como «los soníos más tradicionales de los finisterres atlánticos d’Europa», poniendo especial enfotu n’Asturies y siendo Avilés el puntu de partida d’esti viaxe interceltista del que se pue conocer más nel llibretu que va formar el discu físicu. Pero hai más muncho que tradición; como ellos bien despliquen, allóñense «del minimalismu imperante» qu’hai na escena sonora y siete músicos y milenta instrumentos dan forma a unos temes nos que tamién suena «la electrónica con aires retro, la fuercia del rock, el groove del funk, les pincelaes sincopaez del jazz y la sofisticación de la música progresiva».
El trabayu cocinóse sele nos Estudios 15:40. Foi procesu de cuatro años dende qu’Héctor Aneiros (whistles irlandeses, ocarines, flauta contraltu, gaita electrónica, bombarda bretona, voz, coros y programaciones); Susana Sors (voz, coros y guitarra acústica); Carmen Tomé (vigulín); Jorge Álvarez (bouzuki irlandés, guitarra eléctrica y mandolina); Laura Méndez (sintetizadores y coros); Pablo Santamarta (baxu eléctricu, didgeridoo) y Rubén Cadenas (batería y multipad); entraron a grabar el so primer cenciellu hasta qu’agora pue sentise’l resultáu completu. Nesti tiempu Luis Senén foi’l técnicu de soníu, responsable de la mezcla y máster; Aneiros el productor; y xunto a ellos andecharon les componentes de 6 Riales a les voces y percusiones tradicionales; Pepín de Muñalén al saxofón; Celia Nieto y Olaya Pérez al vigulín y Jesús del Castillo na gaita electrónica.
Un discu con una filosofía como esta nun s’entendería si nun viera la lluz en formatu físicu. D’esta manera, Guieldu van publicar el CD el próximu 3 d’abril. A les 20h el café Trisquel acueye una «audición comentada», daqué que, como presentó la banda nes sos redes sociales, facíase «nos caberos años setenta y primeros ochenta». Xunto a ellos va tar la historiadora Arantza Margolles y ye que la colectividá ye tamién otra de les característiques d’esti álbum qu’inclúi nel llibretu un testu de José Ángel Hevia y otru de Bieito Romero de Luar na Lubre dos referentes pal soníu d’esta xoven banda, como los son tamién otros nomes de la música celta como Capercaillie, Clannad o Wolfstone.
Tres de pisar escenarios tan destacaos como’l Festival Intercéltico de Sendim (Portugal), Festival Internacional do Mundo Celta de Ortigueira o’l Festival Celta Internacional Reinu de Llión; el grupu yá tien les primeres feches confirmaes onde van sonar los temes de Memories de Deva: 5 d’abril na Folixa na Primavera (Mieres); 10 de mayu nel Válgame Fest (Cabrales) y 20 de xunu nel Folkmillas (Cantabria). Cola publicación d’esti discu, la música asturiana vuelve a averase a les sonoridaes más celtes, amosando que sigue habiendo relevu, interés y bon facer ente les xeneraciones más nueves.
Suscríbite a les nuestres novedaes
