Dempués d’asoleyar 286 llunes, Herbamora presenten la pieza audiovisual ‘Lluna de collecha‘, obra de la productora Cortexiphan. L’estrenu va ser el vienres 21 de febreru a les 20h en Lata de Zinc d’Uviéu. Les músiques van tar acompañaes d’Arma X y Estela Cubilla, creadores del videoclip.
‘Lluna de collecha‘ ye una composición de Ruth Suárez sobre una siega de Riballagu (Senabria), una mirada a la vida d’antaño, «onde’l trabayu de les muyeres yera mui pocu valoráu». La lletra ye tradicional y «fala del desencuentru, del desamor. Reconocelo y abrazalo como sentimientos humanos de los qu’aprender pue entendese tamién como collecha: la integración d’aprendizaxes».
El cantar ta dientro del EP 286 llunes qu’asoleyaron en payares de 2024, el so tercer álbum. Herbamora, banda formada por cinco muyeres percusionistes y cantantes venceyaes a la cultura tradicional tornaron dempués de 11 años de parón, con un trabayu discográficu enllenu de presencia y sensibilidá integráu por cinco cantares nos que les percusiones, el xuegu de voces y la electrónica son protagonistes. La presentación del proyectu va ser el 22 de marzu nel escenariu de La Benéfica.
Suscríbite a les nuestres novedaes
