A finales d’avientu Musicasturiana.com incorporó al catálogu de la so tienda -gracies al alcuerdu cola desapaecía discográfica Fono Astur– nueve vinilos orixinales publicaos ente finales de los años 80 y primeros de los 90. Ún de los más demandaos yera’l de Grieska, primer discu de la mítica banda de rock astur Dixebra. Agora yá namás queden siete unidaes a la venta enantes de que se descatalogue dafechu esta ayalga de la música asturiana.
Grieska ye’l primer discu que grabó Dixebra en 1990. Nél suenen temes icónicos del grupu avilesín como ‘Da-yos caña’, ‘Tolos cartelos’, ‘Merucu Xusticieru’ o ‘Manifiestu’l FF’. L’álbum tamién inclúi dos temes que la formación más veterana del rock astur grabara dos en 1989 pa un split compartíu -tamién a la venta en musicasturiana.com- con El Hombre que vendió el Mundo y Aborígenes. Son ‘Skandalera‘ y ‘Rapaza nacionaliega‘ les canciones que formen parte d’esta compilación grabada como premiu del concursu de rock Interbarrios qu’entamó en 1989 la conceyalía de mocedá del Ayuntamientu d’Uviéu.
Agora ye la última oportunidá p’algamar una copia orixinal de Grieska. Los vinilos disponibles nun son de segunda mano, anque sí que presenten dalgunos daños na so carpeta y nel so interior por mor de tar almacenaos durante décades nun trasteru vieyu de Fono Astur. Sicasí, los audios de tolos LPs vendíos hasta la fecha tán en perfectes condiciones. Con esta xera Musicasturiana.com sigue avanzando nel so llabor de «rescatar» de les estanteríes referencies físiques históriques de la música n’asturianu.
Suscríbite a les nuestres novedaes
