El pasáu sábadu 22 de marzu Hevia volvió a amosar que, dempués de 25 años d’asoleyar el so aclamáu Tierra de Nadie y algamar vender n’Europa 1.750.000 copies del trabayu, sigue teniendo muncho qu’amosar, que facer y que decir. El Teatru Campoamor d’Uviéu acoyó un conciertu enllenu de momentos emotivos y collaboraciones nes qu’andecharon les cantantes Marisa Valle Roso y Mariluz Cristóbal Caunedo; los bailladores Pau Santirso y Maite Rozada; el músicu y compositor Ramón Prada; y les bandes de gaites Candás y Ciudad de Oviedo. Dende fuera d’Asturies aportaron tamién el vocalista cántabru Nando Agüeros y l’artista cubana Liuba María Hevia. Foron más de dos hores d’exhibición de la fuercia de la música asturiana, de la gaita y de la tradición. Pablo Fernández Semeyes tuvo presente nel conciertu y cede a Musicasturiana.com dalgunes imáxenes del eventu.
Suscríbite a les nuestres novedaes
