Naz l’Institutu de la Música baxo’l lema Pensamos en música. Creamos futuro, una iniciativa de la Federación de la Música d’España, Es_Música, col sofitu del Ministeriu de Cultura. Col envís d‘impulsar y fortalecer el sector, esti proyectu nuevu busca ser un referente na promoción de la música como motor cultural, económicu y social, trabayando en collaboración con instituciones públiques y profesionales del sector.
Asina lo desplicó mientres l’actu de presentación oficial qu’acoyó la sede de la SGAE en Madrid el Ministru de Cultura Ernest Urtasun, que destacó la importancia de la música como «parte fundamental de la nuestra industria, xeneradora d’emplegu, riqueza y imaxe del nuestru país nel mundu». «La música constitúi la nuestra forma d’humanidá, fainos medrar, articula la nuestra memoria y fainos viaxar», añadió.
L’Institutu de la Música, poro, tien como compromisu trabayar conxuntamente con tolos axentes implicaos nel sector, pa garantizar un futuru onde la música seya un motor de cambiu y crecimientu, un pilar cultural y económicu global, como sorrayó la presidenta d’Es_Música, Soco Collado: «El proyectu que presentamos güei namás tien sentíu si ta basáu na collaboración público privada, agradecemos que’l Ministeriu seya un sociu principal y esperamos que s’unan otres instituciones públiques y privaes pa facelu medrar y ser d’utilidá pal sector».
Con esta idea en mente, el proyectu entama’l so camín con dos puntos clave. Per un llau, la creación d’un observatoriu de la música como centralizador de tolos datos y cifres del sector, pal so analís y difusión. Per otru, el desendolcu d’un área internacional qu’ufra espacios y recursos pa la internacionalización de la música y el so posicionamientu en diferentes puntos del mundu.
Suscríbite a les nuestres novedaes
