«Intentamos llevar al llímite l’estilu nel que nos presta facer les coses y con NÓS la xente pue venos nun contestu distintu»

Esti domingu 4 d’avientu va presentase nel Teatru Riera de Villaviciosa el proyectu NÓS, una collaboración ente la Banda Gaites Ribeseya y el cineasta Pablo Casanueva.  Tres años dempués del so estrenu en Ribeseya, onde tuvo un éxito considerable, esti reestrenu incorpora novedaes y reflexa’l movimientu nel que ta inmersa güei la música tradicional. La cita va tener llugar a les 18.30h, y les entraes pueden retirase de manera gratuita na taquilla del teatru a partir de les 18h. La banda, que tien más d’un cuartu de sieglu de trayectoria, ta dirixida anguaño por Álvaro Cueto, que fala sobre lo que ye esti proyectu y la importancia que tien tanto pa ellos como pa la escena.

NÓS estrenóse va tres años en Ribeseya. Tres años dempués y una pandemia per mediu, de xuru qu’habrá quien nun s’alcuerde del proyectu o quien nun lo viviera ¿Podéis recordar qué ye NÓS?

Ye un espectáculu qu’entemez lo musical y lo audiovisual nuna collaboración ente la Banda Gaites Ribeseya y el cineasta Pablo Casanueva.  L’espectáculu ta formáu por 5 cortes de documental, 5 cortes musicales que se van intercalando de manera concordante y que dan sentíu a esi NÓS que da nome al espectáculu. Tou ello va dende lo más xeneral, dando respuesta a qué son les bandes de gaites, d’onde vienen, qu’importancia tienen a nivel social; a lo más personal: zunes, pensamientos y circustancies propies de los músicos que formen y formaron parte de la banda nestos años. Llegaos a esta parte, entama la estaya musical, que ye un recorríu pel repertoriu de la banda adaptáu a esti formatu, un baille ente la banda en solitario y l’acompañamientu d’una banda de músicos especialmente formada pa esti espectáculu.

Ye la primer vez que cine y una banda de gaites van de la mano. ¿Cómo se ideó’l proyectu? ¿Había rellación previa col cineasta Pablo Casanueva o foi escoyíu precisamente pa esta ocasión?

Ye una idea que teníamos dende va munchos años, pero que nun se llegó a tener más o menos nidia hasta finales del añu 2018. Tanto a Diego como a mí influyónos munchu un DVD del añu 2007 que se llama “ReCharged”, un conciertu de la Pipe Band norirlandesa Field Marshal Montgomery nel que s’intercalaben entrevistes y el conciertu en sí. Tamién veníamos viendo programes de televisión d’estilu documental como Pipe Dreams que fizó la BBC durante los años 2000 con varios capítulos y temporaes a lo llargo de los años, o otros na CBS canadiense también n’esos mesmos años, nos que les cámares entraben dientro de la realidá de bandes qu’almiramos. Tamién producciones de conciertos emitíos por France 3 Bretagne nes qu’entrevistaben y se documentaba la realidá de los bagad. Tou ello dió pie a NÓS, sabiendo que la nuestra realidá, anque parecía a la d’ellos en dalgun casu, n’otros aseméyase bien poco y teníamos la necesidá de reivindicanos y desplicanos como xéneru. 

Con Pablo siempre hubo rellación, dende los entamos d’esta última etapa de la banda, incluso llegó a andechar con nós como músicu. La realidá ye que non hubiéramos entamao esti proyectu ensin él. Cuando vimos a Pablo espoyetar como cineasta foi ún de los momentos nos qu’entamamos a ver esti proyectu posible. Pablo Casanueva ye ún de los representantes más prolíficos de la cultura fecha dende Ribeseya n’estos últimos años, ehí tán los sos trabayos. Tou yera bastante fácil nesti sentiu, conocíanos, con nós ye unu más, entós podíamos facer les coses con naturalidá.

«Influyónos muncho’l DVD Recharged de la Pipe Band Field Marshal Montgomery, programes que fizo la BBC, otros de la CBS canadiense y producciones de conciertos emitíos por France 3 Bratagne»

¿Qué tal foi l’acoyida de la primer representación en Ribeseya? Amás, agora volvéis a interpretalu en Villaviciosa, ¿Por qué nesti conceyu? ¿Vamos siguir viendo NÓS en más escenarios del país?

L’acoyida foi bona, creemos que mui bona. El comentariu más repetiu foi’l de que nun se esperaben dalgo “tan grande”.  Nel documental salen miembros de la banda que faen que tou seya mui cercanu, pero tamién xente como Teban González Corteguera o Llorián García Flórez, gaiteros los dos, nel casu de Teban d’esta banda, que dan una visión musicolóxica o antropolóxica mui didáctica y entretenía pa tolos públicos. No musical, intentamos llevar al llímite l’estilu nel que nos presta facer les coses, y la xente pue venos nun contestu que nun ye’l de siempre.

Que seya en Villaviciosa’l reestrenu ye una mezcla de casualidades, o productu de la falta d’otres opciones. Más que nada porque en principiu nosotros queríamos reestrenar nel nuesu conceyu, pero a día de güei seguimos ensin recibir respuesta a la nuesa propuesta.  Yá dempués del primer NÓS pensamos en xirar l’espectáculu per teatros non mui grandes, entós pensamos en posibilidades d’esti calter que tenemos pela rodiada. Tanto en Llanes como en Cangues d’Onis tán en procesu de reforma de los sos respectivos teatros, entós la siguiente opción yera Villaviciosa. Parte de los componentes de la banda somos de Villaviciosa o residimos en Villaviciosa, polo tantu ye en parte cómodo pa nós.

Tenemos qu’agradecer a la xente de Cultura del Conceyu y a la Banda Gaites Villaviciosa la comprensión y l’ayuda.  Villaviciosa ye un conceyu que dio tamboriteros como Serafín el de Quintes, Sabino Cifuentes o Severino el de Carda, tamién gaiteros como El Gaiteru Lliberdón, José Rendueles, Jose Vega “El Ratu la Madrera”, Ramón el de Espina, históricos tooos ellos, por eso y porque ye un conceyu que tamién tien una de les bandes más importantes nos últimos 36 años n’Asturies, amás del emblema cultural más importante nestos años del conceyu. Entós pa nosotros ye una responsabilidá facer esti espectáculu nel Teatru Riera.

Pel momentu tenemos zarráu esti reestrenu, y a ver si sigue funcionando. En pasando esti momentu decidiremos qué facer, sobretou en función de cómo lo disfrutemos nosotros y cuánto facemos disfrutar a la xente.

Fotograma del documental cola participación de Teban González Corteguera y Llorián García Flórez

Munchos espectáculos de bandes de gaites acaben garrando forma tamién nun formatu físicu a traviés d’un CD y/ o acompañaes d’un DVD. ¿Va ser el vuestru casu?

Agora mesmo nun nos lo planteamos, anque’l primer NÓS foi grabáu tanto videu como audiu, nun quedamos contentos col resultáu del audiu, y tuvimos problemas cola acústica dende’l primer momentu. De toes formes el domingu nel Riera va a poder vese un pedacín d’aquel día durante l’espectáculu. Nun ye una idea que descartemos, pero agora mesmo nun ye prioritario, lo prioritario ye tocar, y dir espoyetando esti proyectu si tenemos el permisu del públicu, y les ganes.

«La música tradicional siempre ta mutando, renuévase, refáise, hasta se fai nueva música tradicional. Ye dalgo intrínsico a ella»

Nos últimos años tamos viviendo una renovación del folclor asturianu a traviés de les nueves xeneraciones, con nueves perspectives y enfoques en grupos de baille, bandes de gaites, etc. ¿De qué trata y en qué sentíu creéis que reflexa NÓS esta realidá?

Creo que tamos nun momentu que ta tocando reinventanos, y mirar al pasáu pa facer vanguardia ye la norma na música tradicional. La música tradicional siempre ta mutando, renuévase, refáise, hasta se fai nueva música tradicional. Ye dalgo intrínsico a ella.

En NÓS reflexase porque vemos videos de los entamos de la primera Banda Gaites Ribeseya a finales de los 90 y a continuación salimos nós, en dalgún casu a tocar la mesma canción, siendo evidente la evolución. Nes bandes de gaites ye una norma, non escrita, y quiciabes más que clara nestos últimos años. Hai coses que cambiar, dende como cuidamos la música, dende dar visibilidá a los percusionistas pa dexar de llau esa frase que nos dicen al llegar a los sitios a tocar: “Ehí lleguen los gaiteros”, siendo siempre ellos los obviaos. La percusión ye de xuru la parte que más evolucionó nes bandes de gaites en toos estos años. Hai que decilo, facer por dexalo claro y da-y valor. 

Cuidar lo nueso, la nuesa xente, y ver el potencial que puede tener la nuesa música y la nuesa cultura nun ye optativo.

«La percusión ye de xuru la parte que más evolucionó nes bandes de gaites en toos estos años. Hai que decilo, facer por dexalo claro y da-y valor» 

La banda lleva yá unos años baxo la dirección d’Álvaro Cueto y Diego Purón. ¿Qué formación diseñaron pa desendolcar el proyectu? ¿Diferénciase de la formación habitual de la banda?

La formación de la banda nun cambia munchu de la de cualquier banda de gaites actual: gaites, caxes, timbales y bombu. Nel mesmu documental desplicamos dalgún detalle nuesu no que cinca a la formación. Pa nós ye importante que se vea una banda gaites, porque ye’l mayor interés, revindicar estes formaciones.

Onde cambia ye que llevamos una banda fecha pa esti espectáculu, cola que vamos pocu a pocu “baillando” a midida que pasa el espectáculu. Acompáñennos Pablo Valdés, guitarrista del míticu grupu ribeseyanu Corquiéu; Xuan Cortes, baxista de la banda de post-rock Melandru, Iyan Ploquín, guitarrista de Melandru, que nesta ocasión ta al mandu de los sintetizadores y les programaciones; Edu Llosa, batería de la Tarrancha, guitarrista d’Abeu y director de la Banda Gaites Villaviciosa; y Ana Canga, vocalista de Mama Sound Project.

«El futuru anque suene simple pasa por nun caer nel nihilismu de que tou se va al garete. En tratar de buscar nueves fórmules, tratar de buscar cierta continuidá, y tratar de tar contentos tocando»

Sois una banda con 26 años de trayectoria y reputación na escena, con premios y participación en numerosos festivales asturianos, estatales e internacionales. ¿Tenéis en mente dalguna otra meta o proyecto nel que teis ya trabayando?

Agora mesmo nun pensamos más allá d’esti espectáculu. Ye mui costoso desendolcar un proyectu d’esta envergadura con xente al fin y al cabu amateur, anque’l resultáu munches veces nun lo paeza.

Creo que tamos nun momentu que, como tantes otres coses n’Asturies, paez que tamos en peligru d’estinción. El futuru anque suene simple pasa por nun caer nel nihilismu de que tou se va al garete. En tratar de buscar nueves fórmules, tratar de buscar cierta continuidá, y tratar de tar contentos tocando. Ye complicáu, porque nestos 26 años, siete d’ellos fueron ensin actividá, y eso tenémoslo continuamente presente. Esta época ta siendo la más llarga en cuanto actividá de la banda, y Ribeseya nun ye “un campu fácil”.

Pa nós sería un llogru que’l conceyu del que formamos parte cubriera d’una vez la deuda histórica que tien con xente como Duardo’l de Sabina o Corquiéu por exemplu. Poner en valor la cultura asturiana fecha nel conceyu Ribeseya, xente que pon, puso y que espero que pongamos a Ribeseya nel mapa de muncha muncha xente.

Les bandes tenemos que mirar a les escueles, y como tooo, somos dependientes de qu’esti ecosistema vaya a meyor y non a peor.  Tenemos que ser conscientes de que si les escueles van bien, les bandes son la meyor salida pa que la xente garre forma y cariñu por la música, y tanto luthiers como músicos folk por exemplu salen ganado de toa esta cadena.

Por lo prontu, NÓS ye un proyectu que ta vivu, esti NÓS nun ye el de 2019, tien cambios, ta evolucionáu, y eso ye lo que tien ser esto. Movimientu.

Mercar discos de gaita na tienda online

Dexa un comentariu

X