Yá ta a la venta en musicasturiana.com Asturies 60. Orígenes y desarrollo del rock and roll en Asturies (1956-1969), la obra nueva del investigador y coleccionista Javier Pedraces que percuerre’l surdimentu del rock n’Asturies. «¿Cuándo apaecieron les primeres noticies sobre’l rock n’Asturies? ¿Qué factores contribuyeron a la difusión de la música popular na década de los 60?» Son dalgunes de les entrugues a les que respuende esta obra, amosando los llogros algamaos por centenares de músicos asturianos, pioneros del rock nesti país.
A traviés de 440 páxines, el llibru fai un repasu pela biografía de más de 150 conxuntos musicales surdíos n’Asturies ente 1956 y 1969, complementándolo con más de 500 semeyes que puercuerren los primeros 14 años del pop-rock d’equí. Gracies a una estensa cronoloxía y a un análisis de los factores sociales, económicos y culturales de la época, el llibru sigue la evolución y espansión d’un fenómeru cultural, el rock and roll, que camudó la sociedá asturiana, constituyendo ún de los primeros episodios de la globalización cultural que llueu aportó.
Un trabayu indispensable pa cualesquier persona interesada na música popular y na historia de la música fecha n’Asturies. Con esta obra, l’investigar musical y responsable del programa radiofónicu Carreteres Secundaries, Javier Pedraces (Cangues d’Onís, 1975), amplía’l so llabor tres de publicar en 2015 el llibru Abriendo Camino. La escena musical en el oriente de Asturies (1960-2014), en 2018 l’artículu La Nuechi Celta de Corao, un Woodstock asturianu y dirixir en 2019 el documental Abriendo Camino. Música desde la periferia urbana.
Suscríbite a les nuestres novedaes
