Yá ta na cai l’Anuariu de la Música Asturiana 2022
Esta selmana entama a distribuyise y asoleya online la edición 2022 del Anuariu de la Música Asturiana, publicación editada por Goxe Producciones que lleva ventidós años faciendo un repasu fondu a lo que dio de sí’l recién pasáu añu en rellación a la música d’espresión asturiana. Como de costume les temátiques céntrense n’estilos como la música tradicional, el folk, el rock o la canción d’autor, con secciones qu’inclúin reportaxes, informes, entrevistes, crítiques, opinión, recoyida de material o anuncies. L’Anuariu ye de baldre, inclúi un CD compilatoriu y pue consiguise en dellos llocales repartíos pel país .
L’Editorial, nesta ocasión, titúlase «Optimismu ensin trunfalismu» y nél fálase de la variedá y calidá de la música asturiana anguaño, nesti sen, manifiéstase: «Creación y consumidores, un binomiu imprescindible pa caltener una escena musical tan especial como l’asturiana. Les bases tán puestes, agora namás falta que los poderes públicos del país, particularmente’l Gobiernu Asturianu y la RTPA, apoyen amañosamente con polítiques y acciones reales, permanentes y ambicioses. Nun cabe ser trunfalistes y hai que siguir trabayando, pero paga la pena aparar per un momentu, mirár atrás, sentir satisfacción pola xera fecha y coyer impulsu pa siguir alantre».
En cuantes a los conteníos, destaquen les cróniques titulaes «Un bon añu pa la música celta n’Asturies» (sobre’l repunte de los festivales folk) y «Una crónica musical dende l’An Oriant más asturianu» (que fai repasu a la delegación asturiana nel Festival Intercélticu d’esa ciudá bretona); l’informe «Política Llingüística vs música n’ast» (análisis de les acciones y presupuestu de l’alministración autonómica nel campu de la música asturiana); el reportaxe «Música urbana n’asturianu» (historia del hip hop nesta llingua); los artículos dedicaos al XXXV Aniversariu de les bandes Dixebra y Los Berrones, les entrevistes a Guieldu, José Manuel Tejedor y Algaire; o la encuesta fecha a los candidatos/representantes de les principales fuercies polítiques de cara a les próximes elecciones autonómiques.
L’Anuariu zárrase, como siempre, cola sección «Collecha», onde apaecen les producciones musicales y bibliográfiques del 2022. El volume compleméntase con un discu nel que se recueyen muestres de lo meyor qu’ufiertó l’añu, con diecinueve cortes repartíos n’estilos como’l folk, el rock, el hip hop o la canción d’autor, con artistes y grupos como Burbús, Fruela 757, Mostru l’Horru, Alfredo González, Nacho Vegas, Dixebra, La Tarrancha, Misiva o Pop Piquiñín.
Puntos de distribución
AVILÉS: Cervecería Cabanón, El Cafetón
CANDÁS: La Rexa
L’ENTREGU: El Fielato Casa Carmina
L’INFIESTU: Cervecería La Traviesa
LLANGRÉU: L’Artesana, Matteria Creativa
MIERES: La Llocura, Rodapié
NAVA: La Naveta
NOREÑA: Copistería La Semeya
TINÉU: Librería Asturias
SIERO: Taberna Cuévano, Abrelatas, El Caricós
UVIÉU: El Manglar, L’Esperteyu, La Raposa, Llibrería Trabe
VALDÉS: Camping Playa de Taurán
VILLAVICIOSA: Escuela de Música Tradicional Banda de Gaites Villaviciosa “El Gaitero”
XIXÓN: Café Trisquel, La Vida Alegre, La Revoltosa, Paradiso, Les Cigarreres
