Esti vienres 21, concidiendo col Día Internacional de la Llingua Materna, va proyectase a les 20h nos cines Embajadores Foncalada d’Uviéu la película Kneecap. Esti filme nomináu a los Óscar cunta la historia real de Kneecap, tríu de hiphop que canta n’irlandés y que nos últimos años convirtióse nuna auténtica revolución pa la música y llingua d’esti país. L’actividá ta entamada pol Grupu Parlamentariu Mestu Covadonga Tomé y, tres de la proyección, va haber un coloquiu moderáu pol qu’esto escribe y nel que van participar Xune Elipe (productor cultural y componente de Dixebra), Elisabeth Montequín (presidenta y directora de L’Enguedeyu y componente de 6 Riales), Miguel Fernandi ‘Burilo’ (periodista y componente de Skama la Rede) y Penélope Miranda (presidenta de l’Asociación de Trabayadores de la Normalización Llingüística).
«¿Fales irlandés? Non, toi deprendiendo. Gracies a vos». Nun ye spoiler, pero esta frase del final de la película resume perfectamente lo que supón esti filme y Kneecap. La historia entama nel oeste de Belfast en 2017. Un profesor de música frustráu colo convencional y avieyao de los materiales llectivos y de los productos culturales qu’había n’irlandés -daqué que taba torgando sumar nueves falantes d’esta llingua minorizada ente les xeneraciones más nueves-, topa por casualidá con dos mozos. Nun son dos rapazos cualesquiera. Politoxicómanos, traficantes, buscavides, con familiares republicanos militantes… y falantes d’irlandés. «Cada pallabra pronuncianda n’irlandés ye una bala que dispares pola llibertá d’Irlanda», ye la llección paternal cola que medraron Mo Chara y Móglaí Bap. Sicasí, llama l’atención la conversación que se produz al entamu de la película ente esti profesor y los futuros raperos; ye una desplicación perfecta de lo que ye la diglosia y los sos efectos:
– «Cuasi nun hai xente que sienta hip hop irlandés»
– «¿Y si facéis que sí?»
– «¿Por qué?»
Y hasta equí llega’l spoiler. La demás historia del aniciu d’esti grupu y del so contestu económicu, social, políticu y cultural pue vese nel llargometraxe -que tamién ta disponible en Filmin– y pa comprobar hasta ónde aportó esti grupu faciendo hip hop n’irlandés -daqué que «nun sentía cuasi naide»- pue restolase per internet: 891.000 oyentes mensuales en Spotify; exitoses xires per Estaos Xuníos, Australia, Canadá; vender 14.000 entraes en cinco hores pal so conciertu del 17 d’avientu de 2025 en Dublín. Eso en cuantes a la música. No que cinca a la película y a la maxistral interpretación d’estos tres actores non profesionales, ta nominada al Oscar Internacional y tien otros 27 premios o nominaciones en certamenes como los European Film Awards, Premios BAFTA o’l Festival de Sundance.
Teniendo en cuenta too esto, pue afirmase que Kneecap ye ún de los meyores exemplos qu’hai p’amosar lo que ye la normalización llingüística. Ye la fuercia que xeneren la música, l’audiovisual y una llingua minorizada cuando s’axunten pa crear un productu cultural de calidá y que consiga conectar cola sociedá. Sicasí, les sos histories de MDMA, farina, sexu y patear el culu a británicos alarmaron -y alarmen- a munchos. El so compromisu políticu con causes como la de Palestina tamién-yos zarraría puertes. A la fin, l’actitú d’estos tres raperos causaron el rechazu de parte del movimientu de reivindicación llingüística y del establishment cultural irlandés -que siempre lu hai, anque seya dientro d’una llingua minorizada-; pero nun se pue negar el llabor granible que tán faciendo pa normalizar y esparder la llingua irlandesa ente la mocedá de dientro y fuera del so país.
Kneecap amuesa tamién la evidencia de cómo les polítiques y iniciatives de normalización llingüística tienen qu’evolucionar p’algamar a públicos y audiencies nueves, poniendo especial enfotu ente les xeneraciones más moces. Kneecap n’Irlanda, Ortiga en Galicia, Chill Mafia n’Euskal Herria, The Tyets en Cataluña… -toos masculinos; porque la brecha de xéneru afecta a toles llingües por igual- son nomes que tán puxando nesti sen n’otros territorios que lleven años desendolcando polítiques efectives de normalización llingüística. ¿Y n’Asturies? Esti vienres, dempués de la proyección nos cines Embajadores, vamos falar d’ello.
Suscríbite a les nuestres novedaes
