Va delles selmanes, David Fernández, músicu habitual de les sesiones folk asturianes, creó la web Asturtrad.eu, un Archivu de Música Folk Asturiana al estilu de los qu’empleguen n’otros territorios con tradición folk como Irlanda y Escocia. Anque ye Inxenieru de Software, nun ye espertu en páxines web, pero fizo posible esti espaciu gracies a la so motivación. Anguaño pueden topase más d’una centena de melodíes, amás d’información sobre les sesiones que se celebren n’Asturies y un tutorial de notación. Trátase d’un proyectu que bebe del llabor de recopilación que yá ficieron otros colectivos como L’Andecha Folclor d’Uviéu, el Grupu Etnográficu L’Oriente, l’ATOAM y ATEM, y músicos de la escena folk y tradicional asturiana.
«N’Escocia abultábame fácil topar recursos pa deprender temes nuevos: llibros, páxines web con partitures, talleres… Al tornar p’Asturies entamé a deprender música asturiana gracies a la xente de les sesiones y a sentir discos, pero nun topaba un sitiu onde poder dir, por exemplu, a alcontrar xotes pa poder xuntales y facer un set pa la siguiente sesión. Nesi momentu costábame topar coses fuera del mundu de la gaita», comenta David. Ye con esti envís col que decidió dar el pasu y poner en marcha la iniciativa. «L’emburrión definitivu foron les slow sessions que movió Celia Nieto en L’Esperteyu. Tábemos pasando temes, enllaces a vídeos y partitures per un grupu de Whatsapp. Paecíame un enguedeyu», porque, confiesa’l músicu: «mientres la pandemia yá me punxera a facer una versión asturiana de TuneArch -una de les mios páxines de referencia pa la música d’Escocia, Irlanda o los EEXX-, cansé y quedó en nada».
«N’Asturies costábame topar coses fuera del mundu de la gaita. L’emburrión definitivu pa crear la páxina foron les slow sessions que movió Celia Nieto en L’Esperteyu»
Sobre’l procesu de desendolcu de la páxina cuenta que s’inspiró nes partes que-y prestaben de TuneArch y TheSession: «Entamé de forma cenciella y fui amestando cosines pasín a pasu, metiendo cambios pequeños -dalgunos vense y otros non- p’ameyorar la páxina y facilitame la vida». La estaya principal ye la de les melodíes, qu’apaecen ordenaes en categoríes según el tipu, cola partitura y reproductor MIDI. Amás, hai información y datos sobre la composición, la tonalidá, una secuencia harmónica pal acompañamientu y referencies de versiones grabaes con enllaces a delles plataformes como Spotify, YouTube y Bandcamp. Estos detalles son importantes porque, como él mesmu desplica, «nin la partitura nin el MIDI cuenten too sobre la pieza; nel mundu del folk, caún tien que xugar y facer la melodía suya».
«Nin la partitura nin el MIDI cuenten too sobre la pieza. Nel mundu del folk, caún tien que xugar y facer la melodía suya»
Asturtrad.eu reserva una seición pa l’axenda de les sesiones folk que se celebren n’Asturies. Dellos díes al mes, un grupu variable de músicos y músiques xúntense en L’Esperteyu d’Uviéu -tolos xueves y dos domingos al mes-, La Taberna Cuévano de La Pola Siero -un miércoles al mes- y El Vino del Inca en Xixón -dos domingos al mes-. La gran novedá de la temporada son, precisamente, les sesiones lentes o slow sessions que, anque nun tán empobinaes específicamente a la xente mozo sinón a l’adautación sele a les melodíes, tán afitándose como un espaciu que puxa pol relevu xeneracional gracies al llabor de Celia Nieto, David Fernández y toles persones que collaboren cola iniciativa. La próxima cita ye esti domingu 23 a les 18h.
Anque ye David Fernández quien s’encarga d’actualizar los conteníos na web y apurrir munches de les trescripciones, trátase d’una ferramienta coleutiva na que puede collaborase unviando temes o plantegando idees y meyores. El flauteru destaca a Pepín de Muñalén como ún de los músicos que más s’implicaron dende l’entamu del proyectu compartiendo les sos partitures, revisando trescripciones o añadendo información sobre compositores y oríxenes de les pieces; y a Dani Álvarez, que propunxo incluyir delles funciones nel reproductor MIDI. Juan Almaraz, Xuan Nel Expósito, Lisardo Prieto, Rigu Suárez, Diego Pangua, Dolfu R. Fernández, Santi Galguera, Diego Álvarez Llao y otros aportaron tamién el so granín d’arena.
Ye por ello que, mesmo falando con él nuna sesión, pel Facebook asociáu a la web o pel formulariu de contautu de la páxina puede collaborase cola iniciativa. «Namás pido paciencia. Va haber coses que se faigan y otres que non porque nun me dedico profesionalmente nin a la música nin a la páxina. Como decía mio güela, que yera de la montaña de Lugo: a modiño, fadráse lo que se pueda», avisa David. Él mesmu agradez l’acoyida del so llabor: «Llegáronme yá dellos mensaxes de xente diciendo que-yos resultó mui útil. Pa mí ye una ilusión enorme».
Semeya de portada de Nabil Amhaz Martínez.
Suscríbite a les nuestres novedaes
