Dos de los grupos nuevos de la música asturiana van dar conciertos esti fin de selmana. Ḷḷariega -tríu formáu poles cantantes y percusionistes Beatriz de Oliveira (Tinéu), Elena Granda (Ribeseya) y Alba Menéndez (Cuideiru) que trabaya col repertoriu del occidente-, actúa’l vienres en Somáu y el sábadu en Porrúa. Per otru llau, Ḷḷueñe -banda folk formada por Alba Gutiérrez (voz y percusiones), David Varela (acordión, percusiones y voz) y Adrián Argüelles (flauta travesera y gaita)-, toca’l sábadu en La Pimpana de Quirós.
«El nuestru conciertu ye un viaxe pel occidente d’Asturies; entamando pela mariña y acabando pel interior. Vamos baxar faciendo un percorríu col patrimoniu musical d’esos conceyos», desplica Alba Menéndez de Ḷḷariega al rodiu lo que van presentar el fin de selmana. Asina ye como xotes, muñeires, sones d’arriba, dance, rebudixos o cariaos van sonar ente’l repertoriu d’esti tríu que, como sorraya Menéndez, ta formáu por «música pal baille que sal directamente de les fontes; puru del tou».
La primer amuesa de too esto ye esti vienres 3 a les 21h nel VI Mercao Indiano de Somáu (Pravia) y el sábadu 4 a les 22h nel Llaciniegu, la romería del Llacín, en Porrúa (Llanes). En menos de diez díes vuelven xubir al escenariu; el domingu 12 de xunetu faénlo na Taberna Narciso de Teberga a la hora’l vermú.
La XXII Seronda d’Avilés acoyó’l payares pasáu l’estrenu de Ḷḷueñe, un tríu de música tradicional formáu por trés persones mui destacaes dientro d’esta escena: Alba Gutiérrez (referente del folk cántabru y actual cantante de Corquiéu), David Varela (multiinstrumentista veteranu que participa nuna montonera proyectos) y Adrián Argüelles (componente d’Entós y La Garrapiella, ente otres formaciones). Trabayen con un repertoriu tradicional de tol cordal y una estética al estilu de les orquestines de principios del sieglu XX. Esti sábadu 4 a les 13h en La Pimpana de Quirós pue vese una amuesa d’ello nel segundu conciertu que van dar.
Suscríbite a les nuestres novedaes
