L-R asoleyen ‘L.luna’ en collaboración con Rodrigo Cuevas

‘L.luna (agarráu) feat. Rodrigo Cuevas’ ye’l nuevu single de V.O.S. Versión. Orixinal. Subtitulada, el esperáu discu de L-R. El cantar yá ta disponible pa sintilu en toles plataformes. Nesti casu, Rodrigo Cuevas acompaña cola so voz al dúu de Leticia Baselgas (voz y pandeiru) y Rubén Bada (guitarras, arreglos y producción). L’orixe de la collaboración remóntase a la primer vegada que Leticia y Rodrigo cantaron y tocaron xuntos nuna folixa esti agarráu pal bail.le, deprendíu de Concha i Clara de Tresmonte (Cangas del Narcea), un cantar interpretáu en delles ocasiones tamién por Rubén Bada nel so proyeutu en solitario col bouzuki.

El videu de ‘L.luna’ ye una obra de diseñu y animación de Leticia Baselgas, fecha a mano, nel que los subtítulos nun van al empar de la lletra del cantar, consiguiendo un xuegu poéticu cola idega del títulu del discu –Versión. Orixinal. Subtitulada-, pero tamién col conceutu de la reinterpretación de la tradición en diverses formes, del «trabayu cola tradición como dalgo que ta vivo», el mandáu dende’l que crean la so música L-R. Poéticu ye tamién el nome de ‘L.luna’: aquella folixa na que Baselgas y Cuevas interpretaron el agarráu de Concha, cantaron «las estrellinas del cielo las cuento y no están cabales», pallabres d’una cuarteta tresformada nesta versión por «la l.luna sonó no cielo ya rióuse del mio amante», un exemplu más de los subtítulos musicales qu’enllenen el prósimu discu del grupu y los temes yá asoleyaos en 2023, Anda neña (Xota, ou dalgo)“, “Trébole (Llixera)yMenodito.

«El discu [V.O.S.] va con esa idega de falar de cómo suenen los sitios, de cómo suenen los llugares, de cómo las diferentes voces que cantaron esos valores patrimoniales inmateriales tuvieron a bien crear ya reproducir -porque eran creadoras y músicas, intérpretes y también compositoras- dende’l so propio criterio estético ya poético esi patrimoniu. A eso apelamos, a la pequeña diferencia, la pequeña llibertá interpretativa de tola xente que nos precedió», comenta Leticia. «Queremos homenaxear nesti casu a las músicas, como foi el casu de Concha, qu’aportaron munchísimo patrimonio inmaterial, y abúltanos, como llevamos pensando dende’l principiu de los tiempos, que nun hai mayor homenaxe a estas músicas que seguir interpretando, dende’l nuesu puntu de vista, dende la nuesa voz personal, el patrimoniu que nos dexaron».

Presentación de V.O.S.

L-R presenta V.O.S. Versión. Orixinal. Subtitulada el sábadu 10 de febreru a les 20:30h na Sala Acapulco de Xixón. Les entraes pueden adquirise yá de forma adelantada na plataforma entradium con un preciu de 12 €, 15 €  en taquilla. El conciertu promete ser una oportunidá única pa sintir al dúu formáu por Leticia Baselgas (voz y percusión) y Rubén Bada (guitarres eléctriques, loopers y efeutos) nuna formación distinta a la de davezu, cuntando cola participación d’otres compañeres de la escena musical asturiana y con el músicu mozu Ferla Megía como artista convidáu.

Merca los discos de L-R y Rodrigo Cuevas

Dexa un comentariu

X