L-R y trece agrupaciones tradicionales ponen cultura de raigañu a la Fiesta de la Música en Xixón

«Enllenar les cais, places y parques de Xixón de música en directo, con una amuesa d’estilos estremaos que pon de manifiestu la creatividá de los artistes llocales y permite’l disfrute de la cultura al aire llibre». Con esti oxetivu la Fundación Municipal de Cultura, Educación y Universidá Popular (FMCEyUP) de Xixón celebra’l 21 de xunu la Fiesta de la Música, fecha que se festexa en más de 120 países de tol mundu y pa la qu’esti conceyu programa venti actuaciones musicales.

La cultura de raigañu va tar bien presente ente les distintes actividaes programaes. El dúu L-R va llevar el so post-folk al Parque Fernando VI d‘El Cerilleru, nun conciertu gratuitu a les 19h d’esi sábadu 21 de xunu. Esi mesmu día trece bandes de gaites y grupos de baille van actuar dende les doce y media la mañana y hasta les ocho la tarde en dellos espacios públicos de la villa. Amás de les de les formaciones venceyaes a la música n’asturianu, tamién van dar conciertos Akin and the Afrobeat Brothers, Conjunto de guitarras y Coro de trombones, The Soulers, Souls in Pain, Loca Bohemia Quinteto y Begoña Olavide y Javier Bergia.

Les actuaciones de l’amuesa de música tradicional son : Banda Gaites Saxum (12.30h, Plazuela San Miguel); Banda Gaites Magüeta (12.30h, Plaza d’Italia); Grupu Folklóricu El Turruxón (12.30h, Plaza de La Guía); Banda Gaites Pepe Blanco (12.30h, Parque de Contrueces); Grupu Folklóricu Na Señardá (12.30h, Plaza’l Marqués); Grupu Folklóricu Covadonga (12.30h, Playa L’Arbeyal); Grupu Folklóricu Excelsior (20h, Plaza Dr. Eguiburu); Asociación de Coros y Danzas Jovellanos (20h, Plaza del 6 d’Agostu); Grupu Folklóricu Flor de Xaranzaina (20h, Parque Madres de la Plaza de Mayu); Grupu Folklóricu El Xolgoriu (20h; Campu Valdés); Banda Gaites Noega (20h, Plaza de les Piscines d’El Llano); Banda Gaites Villa de Xixón (20h; Xardinos d’El Náutico); Banda Gaites Conceyu de Xixón (20h, Parque de la Fábrica de Gas).

Con esta celebración que foi una idea del músicu Joel Cohen en 1976 y quedó oficialmente instaurada en 1982 dende l’Ayuntamientu de Xixón nagüen por «da-y valir a l’amplitú y la diversidá de les práctiques musicales, en tolos xéneros». D’esta manera, entamen esti «festival na cai que busca da-y puxu al poder granible que tien la música como ferramienta d’entretenimientu, qu’arriquez la vida y la fai más plena». Dende la FMCEyUP tamién anuncien que «si llueve, les actuaciones al aire llibre van suspendese».