Esta selmana rematen los XIII Alcuentros de Músiques Asturianes de Xixón con una Tarde en Danza na que van participar Soi Panderetera -agrupación formada pol alumnáu de la EMT La Quintana- y el cuartetu Rollu Folk (vienres 13, a les 20h nel Centru de Cultura Antiguu Institutu) y tamién va ser l’estrenu en directo de Cubasturia Jazz. Esti miércoles 11 a les 19.30h el CCAI va acoyer el primer conciertu d’esti cuartetu que, como desplica’l so pianista y cantante Edgar Olivero, «entemez música tradicional asturiana col jazz cubanu».
«El repertoriu compónse de cantares populares asturianes amestaos con improvisaciones y con una bayura de ritmos como’l son, el chachachá, la rumba, l’habanera, el boleru, ritmos afrocubanos y munchos más», desplica Olivero, cubanu d’orixe pero afincáu en Xixón. D’esta manera, la formación «nagua por esparder la cultura asturcubana hacia nuevos horizontes dende otra visión sonora, col respetu y la sensibilidá por bandera».
Ente’l repertoriu qu’interpreten pueden sentise pieces populares como ‘Bailla Xiringüelu’, ‘Tengo los güechos hinchaos’, ‘Anque soi mui piquñina’ o ‘Escolín primerizu’, amás de temes d’autoría propia. «La mayoría son canciones asturianes cubanijazzeadas» desplica’l fundador d’esti proyectu formáu por Rita Ojanguren a la voz y la percusión, Leo Duarte a la percusión -anque nesti conciertu sustitúyelu Dani Morales-, Julio García Lemus al baxu eléctricu y el yá mentáu Edgar Olivero al pianu y voz.
«Tou entamó con un cantar que me facía reír muncho cada vegada que-y lu sentía cantar a mio suegra: la de ‘Tengo los güechos hinchaos'», desplica Olivero al rodiu l’orixe del grupu. «Llueu cuntóme ella que la cantaba Juan Uría Maqua, historiador y cantador de música tradicional asturiana qu’a la par ye tíu-bisgüelu de mio fíu, polo que’l venceyu familiar ta mui presente», afonda’l músicu cubanu.
D’esta manera, espertó l’interés d’Olivero pola música asturiana de raigañu: «Topé munchos cantares que m’encanten del so repertoriu y como tengo la mala costume d’imaxinar cuasi tola música que siento colos mios propios acordes y el mio propiu ritmu, fui al pianu y rearmonicé esa pieza, esta vegada inspirándome nel soníu del mi tríu de jazz cubanu». Sicasí, el músicu decatóse de que «faltaba daqué» asina ye como amestó’l «cantu asturianu puru y los toques de pandereta«.
El cuartetu lleva trabayando meses nesti proyectu y esti miércoles nos Alcuentros de Músiques Asturianes de Xixón ye la primer puesta n’escena ensin más conciertos tovía a la vista. Enllenu d’ilusión por esti conciertu, Edgar Olivero tien bien claro «qu’unir cultures a traviés de la música ye ún de los regalos más guapos qu’esta nos da» y que «va ser mui prestosu ver públicu de jazz sintiendo cantares tradicionales asturianos y amantes de la tonada y les vaqueiraes vibrando y esfrutando coles improvisaciones que tanto caractericen a la música jazz». Y dizlo un «cubanu, guajiru guantanameru n’Asturies», polo que la orixinalidá d’esta propuesta ta asegurada.
Suscríbite a les nuestres novedaes
