Nun tiempu onde l’accesu a la cultura paez cada vegada más condicionáu pol preciu d’una entrada, la distancia a un teatru o la rixidez de les axendes institucionales, programes como Siente Xixón surden como una bocanada d’aire fresco.
Impulsáu pol Conceyu de Xixón, esti programa propón una fórmula cenciella y poderosa: llevar la cultura a los espacios cotidianos. Música, poesía, microteatru o narración oral dánse cita en bares, cafeteríes y llocales pequeños de la ciudá, xenerando un circuitu artísticu de proximidá que non namás arriquez a quien asiste, sinón que tamién da vida a la cadarma urbana, fortalez el texíu cultural y dinamiza’l sector hosteleru.
« Siente Xixón xenera un circuitu artísticu de proximidá que non namás arriquez a quien asiste, sinón que tamién da vida a la cadarma urbana, fortalez el texíu cultural y dinamiza’l sector hosteleru»
L’oxetivu ye claru y lloable: democratizar l’accesu a la cultura, sofitar a los artistes (llocales y foriatos) y facer de Xixón una ciudá más viva, más abierta, más conectada cola so xente. Ensin embargu, y pesie a estos valores positivos, Siente Xixón enfréntase a una paradoxa esmolecedora: actualmente, la Llei d’Espectáculos Públicos del Principáu d’Asturies nun contempla esti tipu de formatos.
Nun hai encaxe llegal pa estes pequeñes actuaciones n’espacios non concebíos como sales d’espectáculos, lo que dexa nuna especiu de llimbu normativu tanto a los artistes como a los hosteleros implicaos.
Ye más, dalgunes asociaciones del sector denunciaron lo que consideren una competencia deslleal per parte del Ayuntamientu al promover actuaciones culturales fuera del marcu convencional, lo que xeneró controversia y punxo en cuestión la continuidá del programa.
«Dalgunes asociaciones denunciaron lo que consideren una competencia deslleal per parte del Ayuntamientu al promover actuaciones culturales fuera del marcu convencional»
Pero la entruga que debemos facemos nun ye si Siente Xixón encaxa na normativa actual, sinón si esa normativa sige teniendo xacíu nel contestu cultural nel que vivimos.
L’actual llexislación asturiana en materia d’espectáculos foi diseñada nuna época na que la cultura entendíase de manera vertical: un escenariu, un públicu sentáu, un programa anunciáu y unos horarios afitaos.
Pero’l mundu camudó y con él les formes de crear, consumir y compartir cultura. Anguaño, la xente busca esperiencies más cercanes, más espontánees, más integraes na so vida cotidiana. Y los artistes necesiten espacios reales pa crecer, ensayar, equivocase, conectar col públicu y siguir desenvolviéndose.
Nun too pue nin debe pasar per grandes equipamientos culturales nin por festivales puntuales.
«La entruga que debemos facemos nun ye si Siente Xixón encaxa na normativa actual, sinón si esa normativa sige teniendo xacíu nel contestu cultural nel que vivimos»
¿Vamos dexar qu’una norma desfasada afuegue la cultura de base? ¿Vamos deci-yos a los xóvenes músicos, actores y poetes que nun tienen espaciu llegal pa medrar na so propia ciudá?. Asturies nun pue permitise perder talentu nin oportunidaes por culpa d’una llexislación que nun s’adapta a los nuevos modelos culturales.
Programes como Siente Xixón ufren precisamente eso: una plataforma pal talentu emerxente, una vía pa descentralizar la ufierta cultural y una ferramienta pa conectar con públicos estremaos, incluso aquellos que davezu nun se sienten llamaos pola «cultura oficial».
Amás, permiten poner en valor espacios llocales que, acullá de la so función hostelera, conviértense en llugares d’alcuentru, d’intercambiu, de comunidá. En llugar de competir cola ufierta tradicional, esti tipu d’iniciatives la complementen, l’arriquecen y la faen más permeable a los tiempos nuevos.
«¿Vamos dexar qu’una norma desfasada afuegue la cultura de base? ¿Vamos deci-yos a los xóvenes músicos, actores y poetes que nun tienen espaciu llegal pa medrar na so propia ciudá?»
Asturies necesita más programes como esti, non menos. Y pa qu’esto seya posible, urxe una reforma del actual decretu d’espectáculos. La llexislación debe dexar de ver la cultura como un riesgu qu’hai que llendar y entamar a tratala como un derechu qu’hai que garantizar.
Necesitamos un marcu normativu que regule —sí—, pero que tamién protexa y fomente la cultura de base, que reconoza la especifidá de les actuaciones en pequeñu formatu, qu’estreme ente un macroconciertu y un recital acústicu nuna cafetería.
Una normativa qu’entienda que la cultura nun siempre se da baxo focos nin con taquilla, sinón n’espacios cercanos y humanos, onde la rellación ente l’artista y el públicu ye directa, espontánea y munches vegaes inolvidable.
«Programes como Siente Xixón non namás han de caltenese: han d’espardise a otros ayuntamientos asturianos. Porque la cultura nun ye un problema qu’haiga que torgar, sinón una solución qu’hai que fomentar»
Esta reforma nun ye namás una cuestión técnica: ye una apuesta política y social. Apostar por esti modelu ye apostar por un ecosistema cultural más xustu, más diversu y más accesible. Ye apostar polos creadores xóvenes, polos proyectos independientes, polos barrios, pola vida cultural como parte esencial del día a día.
La reforma del decretu ye urxente y necesaria. Necesitamos una normativa moderna, qu’entienda la cultura non como un lluxu reserváu a teatros o festivales, sinón como un bien común que debe allugase nes nuestres cais, barrios y llocales.
Programes como Siente Xixón non namás han de caltenese: han d’espardise a otros ayuntamientos asturianos. Porque la cultura nun ye un problema qu’haiga que torgar, sinón una solución qu’hai que fomentar.
Cristina Sánchez ye parte de la plataforma Unidos por la Cultura en Asturias.
Suscríbite a les nuestres novedaes
