El tríu de música tradicional 6 Riales ta acabantes de llanzar en Spotify y demás plataformes dixitales los sos dos primeros cantares grabaos: «Romances» y «L’allegría que nun falte». Los dos temes formen parte del repertoriu de Sutripar, l’espectáculu qu’esta banda formada poles percusionistes y cantantes Alba Menéndez, Elisabeth Montequín y Natalia Vega; ta llevando per escenarios de tol país.
«»Romances» ye un amestao del Vals de Casares d’Arbás y el Romance de Los Pastores a mou panaderes y «L’allegría que nun falte» ye de composición propia, nació durante’l confinamientu y tien son de gallegada onde tocamos cuyares, llata pimentón y pandereta», desplica la componente de 6 Riales Elisabeth Montequín. La percusionista y cantante esclaria qu’estos temes los grabaron pa publicar videoclips, tando disponible en YouTube’l de «Romances» dende hai unos meses y l’otru en camín.
Amás, Montequín comenta que 6 Riales van siguir grabando cantares y que tienen en mente «asoleyar el discu Sutripar», que ye la pallabra que-y da nome al espectáculu que la formación de la cuenca’l Nalón vien interpretando dende setiembre de 2021 y que se caracteriza por usar instrumentos d’anguaño como la pandereta y otros d’antañu como la llata pimentón, el morteru, les cuyares, la tabla de llavar, les botelles de vidriu, etc. que s’usaben p’animar trabayos, p’actos importantes o pal baille, pero que llueu quedaron en desusu, yá que yeren unes ferramientes a les que se recurría tiempu atrás pola falta d’instrumentos al usu. D’esta manera’l tríu reivindica los raigaños sonoros del país.
Suscríbite a les nuestres novedaes
