Yá ta disponible’l Verkami qu’entama’l grupu astur-bretón La Banda…Latira! pa cubrir los costes de producción, diseñu y fabricación del so primer trabayu discográficu. L’álbum ta grabáu n’abril d’esti añu en Tutu Estudios y la fecha prevista de publicación ye’l mes d’agostu Con esti proyeutu abren una nueva etapa na so andadura musical y pa ello, necesiten algamar una cantidá mínima de 3.000 € en donaciones dende los 15 a los 1.400 euros.
La bandina formada por Diego C. Camiña (percusiones y voz), Floriane Legros (curdión y voz), Rodrigo Joglar (gaita asturiana y voz), Marta González (percusiones y voz) y Nicolas Radin (saxofón barítonu, voz y direición artística) quier asoleyar un discu con 11 temes enérxicos y folixeros, con composiciones propies y músiques tradicionales d’Asturies y Bretaña. Cunten amás cola collaboración de la cantante Morgane-Macarena-Labbe en dellos temes del discu y Sila Herrera foi la encargada de diseñar la nueva imaxe visual del proyeutu, completada coles semeyes d’Iván G. Fernández.
Nel Verkami pue escoyese ente 11 recompenses diferentes. La menor, con 10 € de donación, ye la descarga dixital del discu completu, mientres que la mayor, que pue algamase con 1.400 €, inclúi, amás del CD en formatu físicu y dixital, un conciertu públicu pa una asociación o festival. Ente medies, la recompensa destacada por 15 € col CD físicu y dixital, y otres opciones coles que consiguir la obra de Sila Herrera en formatu postal, tote bag y lámina; un pack de cerveces bretones y asturianes; una nueche de folixa colos componentes del grupu; un conciertu priváu (700€ ); y hasta una hora de silenciu de Nico Radin.
Suscríbite a les nuestres novedaes
