El próximu martes 20 d’agostu remata la sesta edición d’Amosando, el ciclu de presentaciones de discos de música asturiana, con conciertos en formatu íntimu grabaos y emitíos llueu per Internet. La Banda Latira y La Bedur protagonicen esti conciertu/grabación nel que van presentar los sos primeros trabayos: La Banda… Latira! y La bedur (esti últimu ta previstu qu’asoleye en setiembre). L’escenariu va volver a ser Les Naves d’El Natahoyo; y namás van tener invitación a ellos la xente asociao a L’Ensame que pida per corréu electrónicu una de les 5 entraes dobles disponibles.
La Banda Latira ye una bandina astur-bretona influenciada poles funk brass, polos sones contemporáneos y pola música de raigañu de los dos países celtes. Dempués de 13 años de camín, tán acabante asoleyar el so primer discu homónimu.
La Bedur ye un tríu de reciente creación formáu por veteranos músicos de la escena. Nel que va ser el so primer trabayu presenten temes instrumentales de música tradicional influenciada pol bal-folk, jazz, pop, celta o clásica contemporánea.
Cinco ediciones y 28 artistes
Amosando nació en marzu de 2019 a idea de la plataforma musicasturiana.com. Nesti tiempu tocaron 26 artistes pa presentar les sos novedaes discográfiques: L-R, Xaime Martínez, Ún de Grao, D’Urria, Anabel Santiago, Eva Tejedor & Les Pandereteres, Cerezal, Silvia Quesada, Felpeyu, Fruela 757, Bestiariu, Misiva, Carlos Rubiera, José Manuel Tejedor, Llevólu’l Sumiciu, Fernando Valle Roso y Silvia Moreno, Toli Morilla, Caldo y Os Rabizos Baxel, Algaire, Mostru L’Horru, Slum Suit, La Garrapiella, La Bonturné, Antón Menchaca, 6 Riales, Mapi Quintana y Melandru. La suma de los videos de los conciertos algama más de 360.000 reproducciones en YouTube.
Estes actuaciones amuesen la calidá de la música fecha en llingua asturiana amás de la so variedá, yá qu’estilos como’l pop, indie, electrónica, folk, tonada, canción d’autor, rap, jazz y rock suenen nesta iniciativa producida por Ixuxú Cultura, realizada audiovisualmente por Javi Lueje y Rubén Álvarez y subvencionada pola Conseyería de Cultura, Política Llingüística y Deporte del Principáu d’Asturies..
Suscríbite a les nuestres novedaes
