La Banda Sonora de Celia Nieto

Celia Nieto (Cangas del Narcea, 2002) ye una de les persones más actives de la nueva xeneración de músiques d’Asturies. Anguaño ye componente del tríu mozu de folk de cámara Draque y enantes tocó en formaciones como Guieldu, la Banda de Gaitas Conceyu Candamo y Revellas, un dúu de música tradicional gallega y asturiana que formó mentanto estudiaba en Granada cola música callega Eva Outeiro.

Con ella siguimos cola estaya «La Banda Sonora De…«, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.

Sienti la playlist La Banda Sonora de Celia Nieto

Un discu qu’enxamás canses de sentir.

De tolos que se me vienen a la mente, quedaríame con Dual pa contestar, por tolo que deprendí y esfruté escuchándolu una y otra vegada, ensin llegar a cansame.

Si tuvieres que formar parte d’otru proyectu musical, ¿cuál sería?

El mio mundu ye la música folk y tradicional, pero encantaríame probar con propuestes más variaes y distintes. Hai un par de grupos que siempre m’inspiren a salir d’esa zona de confort mía, y son Morgan y Drugos. Si non con ellos, gustaríame tar en daqué asemeyao.

De los cantares que compusisti o interpretes, ¿cuál ye’l to preferíu?

Anque yá di los mios primeros pasos en composición, tovía nun me paez un aspectu relevante de la mio carrera, y nun podría escoyer una de les mios propies creaciones pa responder. Si tuviera qu’elexir dalgún tema que me presta tocar sedría, por exemplu, “Alboraes de Víctor Sáenz”, que deprendí de Llan de Cubel y engánchame muncho últimamente. Tamién “Mudances” del discu Mara de Flavio Benito, pero que yo lu saqué de Dual. Ye ún d’esos temes que presten pol trabayu que costó deprendelos.

«Felpeyu foi siempre y sedrá la mio primera ya principal influencia, y recuerdo más d’una vez emocionándome colos sos directos les primeres (y últimes) vegaes que los vi»

¿Cuándo foi la primer vez que xubisti a un escenariu y que pasó enantes, durante y depués?

La verdá que nun m’alcuerdo del día específicu, pero les primeres veces que xubí a escenarios fuera del cole o la escuela de música, seique foi con Eva Tejedor cuando yera pequeñina y diba a clase de pandereta con ella. Amás, prestábame pola vida porque diba coles mios collacies de la infancia, Elena y Aida.

¿Qué ye lo más inxusto de ser artista?

Yo diría que’l tema financieru principalmente, y lo complicao que ye. Tengo la suerte de que tovía toi estudiando y nun tengo por qué pagar un alquiler. Pero la inseguridá de cómo me voi arreglar nel futuru tráeme nerviosa dende fae dalgún tiempu. A parte d’eso, añadaría tolos comentarios socialmente espardíos tocantes a esti tema, que los mios familiares nun paren de repetime… Si tais lleendo esto, quiérovos igual…

Si fueres Conseyera de Cultura, ¿qué son les primeres coses que fadríes?

Espero nun veme nunca nesa situación. Yá que falé d’economía na entruga anterior, paezme que la principal preocupación nesti casu sería pol tema educativu. La educación musical tamién ta en crisis y ye una pena. Nun se hasta qué puntu ye competencia de la Conseyería de Cultura, pero algo habría de facer.

«Cuando diba al institutu o me xuntaba con xente de fuera va unos años, a veces facíenme dalgunos comentarios sobre la música que me prestaba y, entós, incomodábame dicir de primeres que la escuchaba cuando m’entrugaben»

Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?

Yá dende bien ceo mios pas sacáronme per ehí a ver milenta conciertos, y ye dalgo que nunca podré acabar d’agradece-ys. Felpeyu foi siempre y sedrá la mio primera ya principal influencia, y recuerdo más d’una vez emocionándome colos sos directos les primeres (y últimes) vegaes que los vi. De xuru que los mios collacios músicos s’identifiquen con esa memoria d’infancia de tar sintiendo música ya imaxinase tocándola enriba d’un escenariu. Eso ye lo que me pasaba a min con Felpeyu.

Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?

Va paecer que toi mintiendo, pero nesti círculu nel que me muevo agora dientro de la música asturiana, nun me siento xulgada como pa sentir que tengo qu’esconder lo qu’escucho (menos la danza’l osu…ejem). Más bien ye nel otru sentíu: cuando diba al institutu o me xuntaba con xente de fuera va unos años, a veces facíenme dalgunos comentarios sobre esta música y, entós, incomodábame dicir de primeres que la escuchaba cuando m’entrugaben. Pa nun dexar vacía la rempuesta, voi dicir Mago de Oz.

¿A qué personaxe públicu convidaríes a un conciertu tuyu, a pasar llueu pel backstage y pa qué?

Ye difícil decidise por unu solo, pero posiblemente a Jeremiah Fraites. Tuve nun conciertu suyu l’añu pasáu y, por como fala, creo que conxeniaríamos muncho. Prestaríame falar con él de la vida y aprovechar a tocar un poco xuntos, a ver qué puede salir d’ehí, amás de deprendimientu.

Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?

Agradezo esti últimu puntu pa proponeme lleer más n’asturianu, porque voi confesar que poco foi lo que lleí hasta agora, pero tuvi la suerte de conocer a Helena Trexu nel últimu conciertu del mio grupu Draque na Casa Natal de Xovellanos en Xixón. El ratín que tuve falando con ella foi prestosísimu y perinteresante, asina que sería un honor poder musicar cualesquiera de les sos publicaciones, que tovía tengo pendiente conseguiles pa poder esfrutales como se merecen.

Asina fala Celia Nieto de los cantares qu’escoyó pa la so playlist

Tierra. Felpeyu. Anque ye difícil decidise, si me pregunten por un tema preferíu de Felpeyu, diría esti. Respíngame y nun me cansa. Muestra d’ello ye que sé la lletra entera, dalgo raro en min. 

Preludio. Kittel & Co. Foi importante nuna época na que m’inundaba la desmotivación cola educación reglada de música. Enseñóme que puedo xugar, y que’l nivel musical nun tien por qué ser inferior solo por facer una música distinta a la que m’enseñaben ellí.

Los tres arbolinos. Dual. Ún de los mios preferíos de Dual, un discu del que yá comenté cuánto me presta. Diría qu’aspiro a poder sacar una publicación a esa altura a lo llargo de la mio carrera.

Muñeires de Valdés. Corquiéu. Por esta nueva etapa na que m’alcuentro, escucho este tema y los demás d’esti grupu una y otra vegada últimamente, ¡y con muncho gusto! Incita a baillar y saltar, y ye la mio banda sonora de los últimos meses. 

Cinco de Marzu. D’Urria. Nun tengo una memoria específica pa esti cantar, pero ye un discu que siento davezu y quería representalu equí.

Canxilones. DRD. Un tema mui guapu pa tocar con otros músicos y al que-y tengo ciñu porque me recomendaron deprendelu la primer vegada que fui a una sesión nel antiguu Cafetón d’Avilés.

Josefa – Arriba Limón. Elías García y Mapi Quintana. Un tema guapísimu. Tengo-y especial cariñu porque tuve conciertu priváu d’esta canción unes cuantes vegaes, interpretada polos mios amigos Celia y Julio, que lo bordaben nos ensayos de la primer etapa de Draque en 2021.

Kreisler: Praeludium and Allegro in the Style of Gaetano Pugnani. Janoska Ensemble. Si fuera más llargu’l nome, molaba más. Ye una interpretación que dexa tiesa, y la pieza orixinal podría decise que foi la única que de verdá esfruté nel mio pasu pol conservatoriu.

Tempus fugit. Erwan Menguy. La primer vegada qu’escuché esti tema fici un viaxe en coche nel que lu repetí 7 veces una detrás d’otra. Tovía flipo cuando lu pongo.

O Son Do Ar. Luar Na Lubre. Diría qu’esti tema foi’l primeru que saqué d’oyíu cuando yera pequeña. Recuerdo qu’al entamu nun podía tocar la parte rápida, pero, tres abandonalu un tiempu, cuando lu volví a tocar dime cuenta de que yá podía sacar eses notes que me faltaben, y eso foi un descubrimientu y una gran motivación para siguir tocando.

Brothers in arms. Dire Straits. La de vueltes que-y di al discu de Dire Straits cola mio ma y mio hermanu nel coche diendo y viniendo de clase de música. Con esti tema teníemos que callar toos obligatoriamente pa poder sentilu bien.

Marry You. Morgan. Ensin pallabres.

Xotes. Ú? Ye d’esos temes que presten tocar pola sensación que te dan y, dependiendo del instrumentu, cambien. Ye difícil de desplicar, pero a veces hai música que gusta tocar porque ties que mover l’arcu o los deos d’una determinada manera.

Nun Piquen. Llan de Cubel. Les sesiones folk enseñáronme munchísimo dende que voi recurrentemente. Esti tema ye de los que se suelen tocar y, Llan de Cubel, una de les principales influencies de tolos que participamos. 

Cerezas y Azahar. Ciudad Jara. Encántame la discografía entera de Ciudad Jara, pero esti tema póngolu un poco más que los otros.

Ruxinas. La Bandina´l Tombu. Ún de los discos colos que medré. La primer xota recordóme siempre a la mio familia materna, que ye del conceyu Tinéu.

Guedeya roxa. Xuacu Amieva. Cuando yera pequeña taba obsesioná con formar un grupu, y esti yera ún de los temes que quería meter nel repertoriu. Pero como solo taba yo nel grupu…

Tus lunares. Drugos. Comparto’l gustu por Drugos col mio hermanu y encántame dir con él a los directos.

Che fine ha fatto la poesia?. Davide Di Rossoloni. Recuérdame a munchos amigos y llugares.

When the day is on the turn. Dallahan. Otru de los temes que presten tocar polo que costó sacalos. Y como nun me queda más espaciu na llista, enllázolu con Liz Carroll, que tamién me gusta muncho, porque toquen Anne Lacey´s al final.