Esti sábadu 10 d’agostu celebróse nel Festival Intercélticu de Lorient (Bretaña) la 37 edición del troféu MacCrimmon de gaita, consideráu como’l más prestixosu del mundu celta y nel que compiten gaiteros d’Asturies y Galicia. El gaiteru d’Ayer Diego Lobo Tuñón -de 29 años y director de les bandes de gaites El Gumial (Ayer), Saxum (Xixón) y Garulla (Xixón)-, foi’l ganador del troféu nesti 2024, algamando un premiu pol que yá compitiera otres cuatro vegaes, «un suañu que tenía dende qu’entamé a tocar», en pallabres d’él. D’esta manera, l’ayerán añade esti troféu al Memorial «Remis Ovalle» d’Uviéu, premiu col qu’accedió al MacCrimmon.
Xunto a Diego Lobo, tamién representaron a Asturies na competición Daniel Meré, qu’algamó’l tercer puestu, Nel Cortizo (5ª posición) y Luis Enrique Sánchez (6ª posición). Los cuatro gaiteros interpretaron con maestría un repertoriu con pieces asturianes, gallegues y bretones énte un xuráu formáu por espertos d’estos tres países. Lobo interpretó les pieces asturianes «Coyí d’un artu una flor», el «Saltón», una xota y el «Floréu Remis»; les gallegues «Un lustro», «Fandango Aguamariña» y «Prieguiceira»; y «Marcha Pourlet», «Sonenn ar skorv» y «Gavotte du Faouët» na estaya bretona. Meré, dempués de dellos años participando, quixo «variar nel repertoriu bretón, investigar un poco y afondar más na so música» y, confiesa, «pienso que lo conseguí porque’l xuráu bretón púnxome na primer y segunda posición, asina que ye dalgo de lo que toi mui arguyosu».
Lloñe de la competitividá xabaz propia de los concursos, Meré sorraya, amás del bon ambiente qu’hebo nesta edición, l’allegría que supón que Lobo resultara ganador porque, diz, «merecíalo muncho. Lleva tiempu lluchando por ello y ye un gaiterazu y una gran persona. Toi contentu de que lo ganara y de poder compartir podiu con él». Dambos gaiteros feliciten a los compañeros -a los que-yos une una rellación hasta de maestru-alumnu, como nel casu de Diego Lobo y Nel Cortizo-, y agradecen el trabayu de la organización y de la delegación asturiana encabezada por Iñaki Sánchez Santianes. Coinciden n’animar a los gaiteros y gaiteres a que participen nos concursos: «Los concursos de gaita son imprescindibles pa caltener el nivel de los gaiteros. Animo a la xente a dexar la competitividá de llau y apuntase a estos certámenes porque nun concursu gaita nunca nun se pierde, siempre se gana y se deprende», apunta Diego Lobo.
Suscríbite a les nuestres novedaes
