Esti vienres 7 de payares a les 19h tien llugar nel Teatru Vital Aza de La Pola L.lena la gala final del XVII Premiu Camaretá al Meyor Cantar, l’únicu premiu institucional qu’esiste anguaño pa da-y reconocimientu a la música contemporánea fecha n’asturianu o gallego-asturianu. Lïbre con ‘L’ablugada‘, Herbamora con ‘Eclipse total‘, Ferla Megía con ‘Xatu‘ y Héctor Braga con ‘Valiente‘, son los cuatro proyectos y cantares nominaos nesta edición. Dende MUSICASTURIANA.COM vamos falar esta selmana cada día con ún de los artistes nominaos p’afondar na so participación nel gallardón.
Siguimos el cuestionariu con Héctor Braga, un artista y productor multidisciplinar dedicáu a les músiques clásiques y de folk. Con siete discos asoleyaos hasta la fecha, pue dicise que ye ún de los referentes más afianzaos na música del país con abondes reconocencies y premios. Héctor ye una referencia nel estudiu y conocencia de la música asturiana porque tien una trayectoria granible qu’axunta’l trabayu de campu y la investigación con dos carreres superiores (música y etnomusicoloxía), un máster en comunicación, un títulu profesional de gaita y un doctoráu cum laude n’Historia del Arte y Musicoloxía.
¿Qué supón pa ti la nominación nesti premiu y qué supondría ganalu?
Ye mui prestoso porque una nominación yá ye una reconocencia granible del llabor fechu. Ganar ye una ilusión y sería un puxu importante a tolos niveles, inda más pa los artistes que creamos y cantamos na llingua de nueso, que nun somos tantos. Lo meyor d’esti premiu ye la visibilidá y trabayu qu’ufre a quien lu gana.
¿Por qué escoyisti esti cantar pa concursar?
Porque quiximos da-y visibilidá a la memoria histórica, que ye la temática que tien esti cantar. ‘Valiente‘ ye una historia asitiada nel contestu de la batalla d’El Mazucu, nuna llucha épica onde, naquel añu 1937, malapenes dos batallones (2.500 persones) aguantaron l’emburrión de barcos, aviones y casi 40.000 soldaos y requetés…
¿Tienes daqué especial preparao pa l’actuación del domingu?
La puesta n’escena ta mui cuidada, con lluces y proyeiciones sincronizaes col soníu, que ta miráu al milímetru. Camiento que va presta-y enforma a la xente.
Suscríbite a les nuestres novedaes
