El pasáu mes de xunetu presentábase n’Avilés el llibru Antología Coral Asturiana – Músicas del XXI para el XXI. La obra foi diseñada y dirixida por Guillermo Martínez Vega y David Pérez Fernández, y tien como oxetivu rellanzar la música coral asturiana al traviés de nueves creaciones de destacaos compositores corales. El próximu sábadu 17 d’agostu a les 20h, l’Auditoriu de la Casa Municipal de Cultura d’Avilés va ser l’escenariu del conciertu/estrenu d’esta obra, que promete ser una celebración única de la cultura asturiana, especialmente de la so rica tradición coral.
Esti espectáculu multidisciplinar, que combina palabra, imaxes, poesía y música, va cuntar cola participación de la Coral Avilesina y el Coru de Cámara de la Coral Avilesina, que van interpretar venti de les 34 obres qu’integren esta innovadora antoloxía. La selección musical va ufiertar un percorríu peles composiciones de los diecisiete compositores qu’integren la publicación, ente los que s’alcuentren nomes perimportantes de dientro y fuera d’Asturies, faciendo d’esta obra un referente más allá de les fronteres del país y consolidándose como la mayor y más diversa publicación coral d’obres de nueva creación na historia d’Asturies.
Una de les principales novedaes d’esti eventu ye l’usu del sistema de taquilla inversa. Esti formatu dexa a los asistentes retirar les sos entraes en taquilla, aportar al auditoriu y esfrutar del conciertu ensin un preciu d’entrada. Al rematar l’espectáculu, cada espectador va tener la llibertá de valorar la so esperiencia y decidir cuánto quier pagar, p’asina fomentar la participación activa del públicu nel sofitu a la creación artística local.
Un espectáculu multidisciplinar
El conciertu nun va ser namás un homenaxe a la música coral asturiana, sinón que va entemecer delles disciplines artístiques. D’esta manera, la palabra, la imaxe y la poesía van amestase coles voces corales pa crear un espectáculu orixinal.
Suscríbite a les nuestres novedaes
